2025 оны амралтын өдрүүдийн бокс оффисын амжилтаар “Lilo & Stitch” болон “Mission Impossible: The Final Reckoning” хоёр кино тэргүүн эгнээнд бичигдлээ. Энэ амралтын өдрүүдэд нийт 149 сая ам.долларын тасалбарын орлого бүртгэгдсэн нь өнгөрсөн оны мөн үеийнхээс даруй 120 хувиар өссөн дүн юм.
“Disney”-ийн бүтээл болох “Lilo & Stitch” кино нь 4,410 кино театраар дамжин зөвхөн Хойд Америкт 63 сая ам.долларын орлого олж, долоо хоногийн бокс оффисын жагсаалтыг тэргүүлсэн байна. Энэ амжилт нь өмнөх долоо хоногт тэргүүлж байсан “Sinners” киног ардаа орхиж, 2025 оны хамгийн өндөр орлоготой хоёр дахь кино болоход хүргэв. Кино нь дэлхий даяар нийт 610.8 сая ам.долларын орлого олж, ирэх өдрүүдэд цаашид ч өсөх хандлагатай байгаа аж.
Анх 2002 онд үзэгчдэд хүрсэн энэхүү хүүхэлдэйн кино нь хайр, гэр бүл, нөхөрлөлийн тухай уянгын бөгөөд инээдмийн элементтэй түүхийг өгүүлдэг. 2025 онд уг бүтээлийг амьд дүрслэл болон анимейшн хослуулсан хэлбэрээр дахин амилуулж, “Disney”-ийн хувьд томоохон амжилт авчирлаа.
Нөгөөтэйгүүр, “Sinners” кино долоо дахь долоо хоногтоо 5.2 сая ам.долларын нэмэлт орлого олсон бөгөөд АНУ дахь нийт орлого нь 267.1 сая, дэлхий дахинд 350.1 сая ам.долларт хүрсэн байна.
2025 оны хамгийн өндөр орлоготой кинонуудын жагсаалтад Хятадын “Ne Zha-2” 2.2 тэрбум ам.долларын орлогоор дэлхийд тэргүүлж байгаа бол “A Minecraft Movie” нь зөвхөн АНУ-ын зах зээлээс 947 сая ам.долларын орлогоороо дотоодын жагсаалтыг тэргүүлж байна. Харин “Lilo & Stitch” нь дэлхийн хэмжээнд гуравдугаарт, АНУ-д хоёрдугаарт бичигдэж, энэ оны кино ертөнцийн тэсрэлттэй бүтээлүүдийн нэгээр нэрлэгдээд байна.
