2026 онд Холливудын Алдрын гудамжинд нэрээ мөнхлөх шинэ алдартнуудын нэрсийг албан ёсоор зарлалаа. Эдгээр хүмүүс нь кино урлаг, телевиз, хөгжим болон спортын салбарт үнэтэй хувь нэмэр оруулсан, олон нийтийн хайр хүндэтгэлийг хүлээсэн эрхмүүд юм.
Кино урлагийн салбарын шинэ одод:
Ирэх жил кино төрөлд нэрээ мөнхлөх эрх авсан жүжигчдийн дунд Холливудын сонгодог од Деми Мур, олон улсын нэр хүндтэй жүжигчин Эмили Блант, залуу үеийн төлөөлөл Тимоти Шаламе нар багтжээ. Мөн “Bohemian Rhapsody” киноны гол дүрийг бүтээж Оскарын шагнал хүртсэн Рами Малек, “The Notebook” киногоороо үзэгчдийн сэтгэлд хоногшсон Рэйчел Макадамс, Францын алдарт жүжигчин Марион Котийяр, чадварлаг туслах дүрүүдээрээ алдаршсан Станли Туччи нарын нэр багтсан байна. Харин алдарт найруулагч Тони Скоттод тусгайлан нэхэн хүндэтгэл үзүүлж, од хүртээхээр болжээ.
Телевизийн салбарын төлөөлөгчид:
Телевизийн төрөлд дэлхий даяар танигдсан тогооч Гордон Рамзи, “Buffy the Vampire Slayer” цувралын гол дүрийг бүтээсэн жүжигчин Сара Мишель Геллар, “ER” цувралаар алдаршсан Ноа Уайли нар нэрээ сийлүүлэхээр болжээ. Түүнчлэн дуучин Майли Сайрус нь урлагийн замналаа телевизээс эхэлсэн тул энэ ангилалд од хүртэх юм.
Спортын од:
Спортын төрөлд ганцхан эрхэм нэрлэгдсэн нь NBA-ийн домогт тоглогч Шакил О’Нил юм. Тэрбээр зодог тайлсан ч медиад оролцох, олон нийтийн үйл ажиллагаанд идэвхтэй байсаар, Америкийн соёлын амьдралд гүн нөлөө үзүүлж буй хүн билээ.
Холливудын Алдрын гудамжийн түүхэн товчоо:
Холливудын Алдрын гудамж нь нийт 2 км урт бөгөөд өнөөгийн байдлаар 2700 гаруй алдартан нэрээ мөнхлөөд байна. Энэхүү нэр хүндтэй жагсаалтад багтах нь дэлхий даяарх уран бүтээлчдийн хувьд урлаг, соёлын ертөнцөд оруулсан гавьяаг баталгаажуулдаг хамгийн дээд хүндэтгэлийн нэгт тооцогддог.
