The MongolZ плей-оффын эрхээ авч, PGL Bucharest 2026 тэмцээний шөвгийн наймд багтлаа

Wildcard-ийн эсрэг чухал ялалт байгуулсан Монголын баг дараагийн шатанд өрсөлдөх боллоо

Румын улсын Бухарест хотод болж буй PGL Bucharest 2026 тэмцээнд Монголын The MongolZ баг шөвгийн наймд шалгарч, плей-оффын шатанд өрсөлдөхөөр боллоо. 1.2 сая ам.долларын шагналын сантай энэ тэмцээнд дэлхийн чансааны оноогоор уригдсан манай баг тойргийн шатны чухал тоглолтуудад амжилттай оролцож, дараагийн шатны эрхээ авч чадсан байна.

The MongolZ эхний тойрогт BC.Game Esports багийг, хоёрдугаар тойрогт EYEBALLERS багийг буулган авсан. Харин плей-оффт шууд шалгарах боломжтой тоглолтод Данийн Astralis багт 0:2-оор ялагдсан ч тэмцээнийг үргэлжлүүлэх боломжоо хадгалсан юм.

Өнөөдөр болсон дөрөвдүгээр тойргийн тоглолтод Монголын баг АНУ-ын Wildcard багийг 2:0-ээр ялж, шөвгийн наймд үлдлээ. Тэд эхний мап болох Dust2 дээр 13:11-ээр хожсон бол Nuke дээр 13:8-аар давуу тоглож, цувралыг хаасан байна.

Дараагийн учраа маргааш тодорч, 400 мянган ам.долларын шагналын төлөө өрсөлдөнө

Тойргийн шатны тоглолтууд маргааш өндөрлөх бөгөөд үүний дараа плей-оффын бүх учраа бүрэн тодорхой болно. The MongolZ-ийн дараагийн өрсөлдөгч мөн маргааш шийдэгдэнэ.

Энэ удаагийн тэмцээнд түрүүлсэн баг 400 мянган ам.долларын шагнал авах бол дэд байрт шалгарсан баг 187,500 ам.доллар хүртэх юм. Дэлхийн чансааны тэргүүлэгч хэд хэдэн баг энэ тэмцээнд оролцоогүй нь боломжийг нээлттэй болгож байгаа ч өрсөлдөөн өндөр хэвээр байна.

The MongolZ баг энэ тэмцээнд 1xBet-ийн дэмжлэгтэйгээр оролцож байгаа бөгөөд олон улсын түвшинд амжилтаа ахиулахын төлөө өрсөлдөөнөө үргэлжлүүлж байна.