Загвар, хөгжмийн шинэ үеийн хэрэглэгчдэд чиглэсэн хамтын ажиллагааг Ray-Ban албан ёсоор зарлав
Дөрөвдүгээр сарын 9-нд домогт нүдний шилний брэнд Ray-Ban BLACKPINK хамтлагийн гишүүн Женниг дэлхийн шинэ төлөөлөгчөөрөө албан ёсоор зарлалаа. Энэ хамтын ажиллагаа нь загвар, хөгжим сонирхдог шинэ үеийн хэрэглэгчдийг дэлхий даяар татах зорилготой юм.
Женни хамтын ажиллагааныхаа талаар, “Ray-Ban-тай хамтрах болсондоо би маш их баяртай байна. Эхнээсээ л бүх зүйл маш жам ёсны мэт санагдсан. Миний хувьд өөртөө итгэлтэй байна гэдэг бол чанга, сүртэй зүйл биш. Харин дотоод амар тайван байдал, өөрийгөө тайван илэрхийлэх чадвараас төрдөг. Ray-Ban ч яг ийм мэдрэмжтэй гэж надад санагддаг. Энгийн, тодорхой, өдөр тутамд эвтэйхэн. Өдөр бүр хамт байдаг, сэтгэл санааны нэг хэсэг болдог зүйлс надад таалагддаг. Энэ хамтын ажиллагаа яг тэр мэдрэмжийг төгс илэрхийлж байна” хэмээн хэлжээ.
Шинэ хамтралд Женнигийн зоримог төрх, 90-ээд оны өнгө аяс, Meta шугамын технологи хосолжээ
Энэ мэдэгдэлтэй зэрэгцэн Ray-Ban Женнигийн зоримог өнгө төрх, илэрхийлэл, өөртөө итгэлтэй байдлыг тусгасан шинэ хамтын ажлаа танилцуулсан байна. Үүнд 90-ээд оны хэв маягийг санагдуулам винтаж металл хүрээтэй загварууд, ретро “муурын нүд” хэлбэрийн шилнүүд багтжээ. Эдгээр загварыг өдөржин тав тухтай хэрэглэх, олон төрлийн хувцастай зохицохоор бүтээсэн байна.
Хамтралыг хоёр үндсэн чиглэлд хуваан танилцуулжээ. Нэгдүгээрт, Ray-Ban-ийн үндсэн шугам нь минимал хэв маягтай бөгөөд Женнигийн дүр төрхтэй уялдсан улаан өнгийн акценттай байна. Харин “Ray-Ban Meta” шугам нь цэнхэр өнгөөр илэрхийлэгдэж, технологи ба загварын нэгдлийг онцолжээ.
Хамтын ажиллагааны хүрээнд Женни “Ray-Ban Meta Blazer” загварыг зүүсэн байна. Энэ нь нарийн силуэттэй хүрээ бөгөөд чамархайн хэсэг болон хамрын тулгуурын хийцийг сайжруулснаар илүү эвтэйхэн суулттай болсон загвар аж.
Мөн “Daddy-O”, “Alix”, “RB3774D”, “RX3774VD”, “RX5449D” зэрэг бусад загваруудыг танилцуулжээ. Эдгээр нь ретро, Y2K өнгө аяс, мөн Азийн зах зээлд тохирсон суулттай хувилбарууд зэрэг өөр өөр дизайны чиглэлийг илэрхийлж байна.
