“Сандал хүртэл мурийсан байна” гэх шүүмжлэл цахим орчинд тархав
IVE хамтлагийн гишүүн Жан Вонён дахин цахим орчны анхаарлын төвд орлоо. Энэ удаа түүнийг Instagram-д нийтэлсэн шинэ зургууддаа хэт их засвар хийсэн байж магадгүй гэсэн шүүмжлэл дагалдаж, фенүүд болон хэрэглэгчдийн дунд хүчтэй маргаан өрнөж байна.
Шинэ үеийн к-попын “гүнж” хэмээн нэрлэгддэг Жан Вонён урт хугацааны турш хүүхэлдэй мэт төрх, бараг өөгүй биеийн харьцаагаараа магтаал хүртэж ирсэн. Гэвч энэ удаагийн зургууд олон хүний эргэлзээг төрүүлжээ. Зарим ажиглагчийн хэлснээр түүний нүүр ер бусын жижиг, богино харагдаж, эрүү нь хэт хурц өөрчлөгдсөн мэт, хамар нь ч натурал бус хэмжээнд нарийн болсон мэт санагдсан байна.
Мөн өмнө нь түүний ялгардаг онцлогт тооцогддог том, тод нүд ч энэ удаа хэлэлцүүлгийн сэдэв болов. Зарим хэрэглэгч өнгийн линзний нөлөө хэт их мэдрэгдэж, харц нь амьд биш, бүр сул дорой харагдаж байна гэж үзжээ. Үүн дээр нэмэгдээд хүчтэй шүүлтүүр ашигласан мэт сэтгэгдэл төрж байгаа учраас нийт төрх нь “хөшүүн”, “хиймэл” болсон гэж шүүмжилсэн байна. Зарим нь бүр лав баримал шиг харагдаж байна хэмээн бичжээ.
Маргаан улам хүчтэй болсон шалтгаан нь зурган дээрх арын фонтой холбоотой байв. Сайн ажигласан хэрэглэгчид нэгэн сандал илт мурийж гажсан мэт харагдаж байгааг анзаарсан бөгөөд үүнийг зураг засварласан байж болзошгүй алдааны нотолгоо гэж тайлбарлаж эхэлжээ. “Сандал хүртэл нугарчихсан байна” гэх агуулгатай сэтгэгдлүүд хурдан тарж, энэ асуудал цахим орчинд өргөн хэлэлцэгдэв.
Айдолуудын дүр төрх, бодит байдал, дарамтын тухай хэлэлцүүлэг дахин сөхөгдөв
Энэ нь Жан Вонёны хувьд анхны ийм шүүмжлэл биш юм. Өнгөрсөн хугацаанд түүнийг гоо сайхны мэс ажилбар, дүр төрхийн нэмэлт өөрчлөлттэй холбоотой таамаг олонтоо дагаж байсан. Зарим хэрэглэгч түүний “хамгийн үзэсгэлэнтэй айдол” гэсэн имижийг хадгалах дарамт улам хүчтэй болж, гадаад төрхөд нь илүү мэдэгдэхүйц өөрчлөлт гарахад нөлөөлсөн байж магадгүй гэж үзэж байна. Тухайлбал, давхраа нь илүү хурц болсон, уруул нь өмнөхөөсөө дүүрэн харагдаж байгаа гэх ажиглалтууд ч дахин сөхөгджээ.
Гэсэн ч түүнийг өмгөөлсөн байр суурь мөн цөөнгүй байна. Зарим фен зураг засварлалт энтертайнмент салбарт түгээмэл үзэгдэл болсон, харин бодит бус гоо сайхны шалгуур залуу айдолуудад хэт их дарамт үзүүлдэг гэдгийг онцолжээ. Иймээс энэ маргаан нь зөвхөн нэг зурагтай холбоотой асуудал биш, харин к-поп ертөнц дэх бодит байдал, дүр төрхийн удирдлага, залуу одод дээр ирдэг хүлээлтийн талаар илүү өргөн хэлэлцүүлэг өрнүүлж байна.
