Монгол Улс болон Бүгд Найрамдах Солонгос Улсын хооронд дипломат харилцаа тогтоосны 35 жилийн ойд зориулсан “Солонгон гүүр” хамтарсан уран бүтээлийн үзэсгэлэн 2025 оны зургаадугаар сарын 7-ны Бямба гарагт 18:00 цагаас “Монгол” арт галерейд нээгдэхээр болжээ.
Уг үзэсгэлэн нь энэ онд анх удаа зохион байгуулагдаж буй Улаанбаатар биенналийн хүрээнд багтаж буй онцлох арга хэмжээний нэг юм. Монгол болон Өмнөд Солонгосын нийт 34 уран бүтээлч оролцож, хоёр орны уран бүтээлчдийн дуу хоолой, үзэл баримтлал, уран сэтгэмж, арга барил, өв соёлыг нэгэн орон зайд харилцуулж буйгаараа соёлын шинэ гүүрийг бий болгож байгааг илэрхийлж байна.
Үзэсгэлэнд тавигдах бүтээлүүд нь эх орон, түүх, уламжлал, ахан дүүсийн уялдаа холбоо, соёлын шилжилт, байгаль орчны асуудал, хувь хүний дотоод мэдрэмж зэрэг өргөн хүрээний сэдвийг хамарч байгаа юм. Монголын зургийн уламжлалт арга барил, Солонгосын нарийн дэг жаягт суурилсан уран чадвар, орчин үеийн дүрслэх урлагийн хэлбэрүүд, холимог техник, өрөг болон медиа урлагийг хослуулсан шинэлэг шийдлүүд энэхүү үзэсгэлэнд багтжээ.
“Солонгон гүүр” үзэсгэлэн нь бодит ба төсөөллийн зааг дээр уран бүтээлчдийг уулзуулж, орон зай болон цаг хугацааг холбох шинэ сэтгэлгээний орон зайг нээж байгаа нь онцлох ач холбогдолтой юм. Үзэсгэлэн зургаадугаар сарын 13-ныг дуустал олон нийтэд нээлттэй байх бөгөөд зохион байгуулагч, дэмжигч байгууллагууд энэхүү соёлын харилцааг шинэ түвшинд гаргах зорилгоор хамтран ажиллаж байна.
