Дотуур хувцасны сурталчилгаа Холливудын тэмдэгтэй мөргөлдлөө
Америкийн жүжигчин Сидни Суини шинэ дотуур хувцасны брэндийнхээ сурталчилгааны аяны хүрээнд шөнө дөлөөр Холливудын алдарт бичиг дээр зөвшөөрөлгүйгээр хөхний даруулга өлгөсөн нь олон нийтийн ширүүн шүүмжлэл, маргааныг дагуулав.
Los Angeles Times–ийн мэдээлснээр, жүжигчин бүсгүй Syrn нэртэй дотуур хувцасны брэндээ сурталчлах зорилгоор Холливудын толгод руу багийн хамт очиж, бичгийн үсгүүд дээр хөхний даруулга өлгөсөн зураг авалтыг хийжээ. Энэ бүхнийг шөнийн цагаар зохион байгуулсан бөгөөд анхнаасаа маркетингийн “олж харуулах” акц гэж төлөвлөгдсөн байна.
Instagram-д нийтэлсэн бичлэгээс “нууц” зураг авалт ил болов
Суини өөрийн Instagram хаягтаа кампанит ажлын бэлтгэл, хэрэгжилтийг харуулсан богино хэмжээний бичлэг байршуулах үед уг үйлдэл олны анхааралд өртсөн. Бичлэг дээр жүжигчин болон түүний баг дотуур хувцас дүүрэн хайрцаг, уутыг машиндаа ачсаар Холливудын толгод руу өгсөж, дараа нь тэмдэгтийн үсгүүд дээр хөхний даруулга өлгөж байгаа нь тод харагдана.
Зарим кадрт тэд бичгийн ойролцоо байрлах хэсэгт авирч, үсгүүдийн завсраар уяа татаж, түүгээр дамжуулан хөхний даруулгыг сунган өлгөж буй нь ажиглагдана. TMZ–ийн мэдээлснээр, зураг авалт шөнө болж, цэвэр сурталчилгааны зорилготой байжээ.
Холливудын Худалдаа, Аж Үйлдвэрийн Танхим зөвшөөрөөгүйг мэдэгдэв
Энэ бүхний дараа Холливудын Худалдаа, Аж Үйлдвэрийн Танхим албан мэдэгдэл гаргаж, Холливудын бичгийг арилжааны зорилгоор ашиглах талаар урьдчилсан ямар ч зөвшөөрөл, лиценз олгоогүй гэдгээ онцлон мэдэгдэв.
Тус танхим нь алдарт тэмдэгтийн оюуны өмчийн эрхийг эзэмшдэг бөгөөд ашгийн бус Hollywood Sign Trust байгууллагатай хамтран хяналт, хамгаалалт, менежментийг нь хариуцдаг. Хоёр байгууллага хоёулаа Syrn брэндийн кампанит ажлын талаар хэвлэл мэдээллээр дамжуулан, хожим нь л мэдсэн гэж тайлбарласан байна.
Холливудын Худалдаа, Аж Үйлдвэрийн Танхимын дарга Стив Ниссен тэмдэгтийг арилжааны зорилгоор ашиглахыг хүсэж буй бүх этгээд танхимаас заавал албан ёсны зөвшөөрөл, лиценз авах ёстойг онцлон сануулжээ. Тэрбээр Сидни Суини оролцсон зураг авалт ийм зөвшөөрөлгүй, албан ёсоор зөвшөөрөгдөөгүй үйлдэл байсан гэдгийг тодорхой болгосон.
FilmLA зөвшөөрөл зөвхөн бүс нутагт, харин бичигт биш
TMZ–ийн мэдээлснээр, зураг авалтын өдөр FilmLA байгууллага тухайн бүс нутагт кино, сурталчилгааны зураг авалт хийх ерөнхий зөвшөөрөл олгосон байж болзошгүй. Гэхдээ энэ зөвшөөрөл Холливудын бичгийг өөрчлөх, түүн дээр обьект өлгөх, арилжааны зорилгоор шууд ашиглах эрх олгодоггүй гэж Холливудын тал тайлбарлаж байна.
Холливудын Худалдаа, Аж Үйлчилгээний Танхим болон Hollywood Sign Trust–ийн төлөөлөгчид тэмдэгт өөрийг нь зураг, видео контентод ашиглахын тулд тусдаа нэмэлт зөвшөөрөл, лицензийн хураамж шаарддаг гэдгийг дурджээ. Тэдний хэлснээр, ийм төлбөрийн тодорхой хэсэг нь бичгийн засвар үйлчилгээ, хамгаалалт, урт хугацааны хадгалалтад зориулагддаг.
Цагдаагийн байгууллага хэрэг нээгээгүй ч маргаан намжаагүй байна
Лос Анжелесийн Цагдаагийн Газраас одоогоор хууль бусаар нэвтрэх, нийтийн өмчид гэмтэл учруулсан гэх үндэслэлээр хэрэг нээх шийдвэр гаргаагүй, мөн албан ёсны гомдол, мэдэгдэл хүлээн аваагүй гэж мэдээлсэн.
Гэсэн хэдий ч олон нийтийн сүлжээнд асуудал намжаагүй байна. Зарим хэрэглэгч жүжигчний энэ үйлдлийг “сонирхол татах уран сэтгэмжтэй маркетинг” гэж өмгөөлж байхад, нөгөө хэсэг нь нийтийн бэлгэ тэмдгийг хувийн брэндийн сурталчилгаанд ашигласан нь хэтэрхий дэггүй, хариуцлагагүй алхам болсон гэж шүүмжилж байна.
Холливудын бичиг: хатуу хоригтой ч үе үе “туршигддог” бэлгэ тэмдэг
Холливудын бичиг анх 1923 онд кино, үл хөдлөх хөрөнгийн сурталчилгааны зорилгоор босгогдож, дараа нь хотод хандивлагдан, Лос Анжелесийн нүүр царай, дэлхийн кино урлагийн бэлгэ тэмдэг болон өөрчлөгдсөн түүхтэй. Түүнд авирах, гадаад төрхийг нь өөрчлөх, үсэг, хэлбэрийг түр зуур ч гэсэн зөрүүлэх үйлдэл хууль, дүрмээр хориглодог.
Гэсэн ч ийм дүрэм зөрчсөн тохиолдол түүхэнд цөөнгүй удаа гарч байв. Хамгийн алдартай жишээ нь 1976 онд бичгийг хэсэг хугацаанд “Hollyweed” болгон өөрчилсөн явдал бөгөөд түүнээс хойш ч тэмдэгт хүрч очих, үсэг өөрчлөх оролдлогууд тасраагүй байдаг. Энэ удаагийн Сидни Суинигийн акц нь тэдгээр маргаантай үйлдлүүдийн хамгийн сүүлийн жишээ болж үлдлээ.
