Гоо сайхан, фэшн контентоороо танигдсан Ютюбэр Фрийзиа (жинхэнэ нэр нь Сон Жиа) Samsung утас ашигладаг найз залуутай болзохгүй гэсэн хошигнол маягийн үг хэлж, цахим орчинд маргаан дэгдээлээ.
Тэрээр “THE Freezia” сувагтаа оруулсан сүүлийн влог дээрээ найзтайгаа ухаалаг утасны талаар ярилцах үеэр өөрийн “сонголт маш тод” гэдгээ илэрхийлсэн байна. Фрийзиагийн хэлснээр найз нь “найз залуу маань Samsung Flip ашигладаг” гэж ярьсан бөгөөд үүнийг сонсоод тэр “үнэндээ миний найз залуу Samsung хэрэглэдэг байсан бол би жаахан дургүй хүрэх байх” гэж хэлжээ. Тэр мөн “ээж, аав хоёр маань хоёулаа Samsung хэрэглэдэг. Гэхдээ эцэг эх, найз залуу хоёр өөр шүү дээ. Тэр утсаар намайг зураглаад зогсож байна гэж төсөөлөхөд хүртэл уур хүрээд байдаг” гэж нэмсэн байна.
Найз нь үүнийг улам хөөргөж “Зиа, би чамд зураг аваад өгье” гээд хавтастай Samsung утсаа дэлгэж байна гэж тоглоход Фрийзиа шууд эвгүйцсэн реакц үзүүлжээ. Тэр энэ тухайдаа Samsung, iPhone хоёрын зураг “харагдах байдал өөр” гэж тайлбарлан, чанарын ялгаа мэдрэгддэг гэж ярьсан байна.
Үүний хариуд найз нь “аавын авсан зургууд маш гоё гардаг” гэж няцаахад Фрийзиа өөрөө Samsung утсыг бараг хэрэглэж үзээгүйгээ хүлээн зөвшөөрчээ. “Би Samsung утсанд хүрч үзсэнээ үнэндээ санадаггүй” гэж хэлээд “миний эргэн тойронд Samsung хэрэглэхийг зөвшөөрдөг хүмүүс гэвэл ээж, аав хоёр л” гэж хошигносон байна.
Гэсэн ч тэр Samsung-ийн Flip загвар нэг үе анхаарал татаж байсан гэдгийг дурдаж, “Flip анх гарахад их хөөрхөн харагдаж, хуучны хавтастай утсыг санагдуулж байсан” гэж ярьжээ. Гэвч эцэст нь “надад iPhone ашиглах нь илүү амар” гэсэн байр сууриа хадгалсан байна.
Сон Жиа 2021 онд Netflix-ийн болзоо, реалити төрлийн “Single’s Inferno” нэвтрүүлэгт оролцсоноор олны танил болж, улмаар гоо сайхан, загварын инфлюэнсерийн карьераа хүчтэй өсгөсөн гэж үздэг. Харин нэр хүндийнхээ оргил үед түүнийг хуурамч тансаг брэндийн бүтээгдэхүүн өмссөн гэх маргаан дагуулж байсан бөгөөд тэрээр гараар бичсэн уучлалт гаргаж, YouTube бичлэгээрээ мөн тайлбар хийж байв. Дараа нь нэг хэвлэл тухайн маргаанд холбогдсон 21 эд зүйлийг шалгаж, 13 нь жинхэнэ, харин зарим нь хуурамч болох нь тогтоогдсон гэж мэдээлсэн байна.
