Дэлхийн нэрт жүжигчин, хүмүүнлэгийн үйлстэн Анжелина Жоли дайнд өртсөн, гэр бүлээ алдсан хүүхдүүдийг дэмжих зорилгоор Газын зурваст тусламжийн тосгон байгуулах төлөвлөгөөгөө ил болгожээ.
Хүмүүнлэгийн томоохон төсөл
Палестины идэвхтэн Самер Синжлави Германд “Кандид” сангаас зохион байгуулсан онлайн хэлэлцүүлгийн үеэр Жолигийн санаачилгыг танилцуулсан байна. Түүний хэлснээр, Анжелина Жоли Газын зурваст өнчин, дайны хохирогч хүүхдүүдэд зориулсан хамгаалалттай тосгон, сургууль, сэтгэлзүйн сэргээн засах төвүүд бүхий хүмүүнлэгийн цогцолбор байгуулахаар төлөвлөж байгаа аж.
Синжлави хэлэхдээ:
“Энэхүү санаачилга нь Анжелина Жолигийн гүнзгий хүмүүнлэгийн үүрэг амлалт, дайнд сүйдсэн нийгмийг сэргээн босгоход бодит хувь нэмэр оруулах чин хүсэл эрмэлзлийг илтгэнэ. Тэрээр улс төрөөс ангид байр суурь баримталж, мөргөлдөөний бүсэд амьдарч буй энгийн иргэдийн талд зогсдог дэлхийн цөөхөн оддын нэг юм.”
Иргэний нийгмийн оролцоог онцоллоо
Синжлави мөн өөрийн X (хуучнаар Twitter) хаягаар бичихдээ:
“Иргэний нийгмийн үүрэг нь засгийн газруудын хүчин чармайлтаас дутуугүй чухал. Газын ард түмэнд туслах санаачилгуудыг газар дээр нь хэрэгжүүлэх ёстой”
гэж тэмдэглэжээ.
Олон нийтийн хариу үйлдэл
Энэхүү мэдээ гарснаас хойш олон нийтийн сүлжээнд өргөн дэмжлэг хүлээж, олон хүн түүний үйлдлийг “итгэл найдварын гэрэл”, “дайны сүүдэрт амьд үлдсэн хүүхдүүдэд өгч буй итгэлийн дохио” гэж нэрлэжээ. Жолигийн хүмүүнлэгийн байр суурийг олон улсын ажиглагчид сайшааж, НҮБ-ын сайн санааны элчин сайдын хувьд түүний үүрэг улам бэхжиж буйг онцолж байна.
Анжелина Жолигийн өмнөх мэдэгдэл
Жоли хамгийн сүүлийн дайны үеэр Газын энгийн иргэдтэй эв санаагаа илэрхийлсэн анхны Холливудын оддын нэг байсан юм. Тэрбээр 2023 оны аравдугаар сард олон нийтийн сүлжээнд нийтэлсэн постдоо:
“Израильд болсон явдал бол терроризмын үйлдэл боловч энэ нь Газын гэмгүй иргэдийг хөнөөхийг зөвтгөж чадахгүй. Тэндэхийн олон хүн орон байр, хоол хүнс, хоргодох газаргүй амьдарч байна”
хэмээн бичиж байжээ.
