2024 оны тавдугаар сарын 5-ны өдөр Монголын хип хоп урлагийн нэрт төлөөлөгч, Ice Top хамтлагийн тэргүүн гишүүн Б.Оргил-Эрдэнийн салах ёс гүйцэтгэх ёслол боллоо. Тэрээр дөрөвдүгээр сарын сүүлээр Малайз улсад сураггүй алга болж, хэд хоногийн эрлийн дараа түүний төрсөн дүү таагүй мэдээг олон нийтэд дуулгасан юм.
Сүхбаатарын талбайд зул өргөхөөр цугласан олон түмэн дотроо шингээж чадахгүй уй гашуудаа илэрхийлж, цахим орчинд мянга мянган хүн эмгэнэл илэрхийлсэн нь түүний Монголын урлагт эзэлж байсан байр суурь, үзүүлсэн нөлөө ямар гүн байсныг харууллаа.
1990-ээд оны сүүлчээр бүжгийн хамтлаг байдлаар байгуулагдсан Ice Top хамтлаг хожим хип хоп урсгалд шилжин, Монголын хөгжмийн ертөнцөд цоо шинэ өнгө төрх, зоригтой дуу хоолойг авчирсан. Залуусын амьдрал, нийгмийн асуудлыг зоригтойгоор хөндсөн тэдний бүтээлүүд зөвхөн дотооддоо бус, Азийн зарим оронд ч хүрч, олон улсын хөгжмийн сувгуудаар цацагдаж байв.
Хамтлагийн гол дүр, дуу хоолой нь Eyescool нэрээр алдаршсан Б.Оргил-Эрдэнэ байсан. Тэр зөвхөн уран бүтээл туурвиж байсангүй, харин залуусын сэтгэл зүрхийг илэрхийлж чадах, үнэнч шударга, тэмцэгч дуу хоолой болж чадсан юм. Түүний бүтээлүүд “Superior” зэрэг уран бүтээлд шингэсэн сэтгэлийн дуудлага, амьдралын үнэнийг харуулсан агуулгаар хүмүүсийн сэтгэлд хоногшсон байдаг.
Ice Top хамтлагийн уран бүтээл “Хөгжим бол хил хязгааргүй, бүхнийг холбох хүчтэй хэл” гэдгийг олон жил нотолж ирсэн. Англи хэл дээр гаргасан уран бүтээлүүд нь Монголын соёлыг дэлхийн тавцанд хүргэхэд томоохон гүүр болж өгсөн.
Б.Оргил-Эрдэнэ бол эх оронч үзэлтэй, урлагт бүх сэтгэлээ зориулсан жинхэнэ уран бүтээлч байлаа. Түүний зам мөр, уран бүтээл өнөөгийн болон ирээдүйн олон зуун залуу уран бүтээлчид, хөгжмийн сонирхогчдод чиглүүлэгч гэрэл хэвээр үлдэнэ.
Монголын хөгжмийн ертөнц нэгэн гэрэлт одоо алдлаа. Гэвч авьяас, сэтгэл, зориг нь бидний дунд бүтээл болон, дурсамж болон, урам зориг болон мөнхөд хадгалагдана.
