Монголын балетын урлагийн түүхэн үйл явдал болоход тун ойртлоо. Улсын дуурь, бүжгийн эрдмийн театр (УДБЭТ)-аас 2022 оноос эхлэн зохион байгуулж ирсэн “Mongolian Grand Prix” олон улсын балетын уралдаан энэ сарын 21, 22-нд болох гэж байна.
Уг уралдаан нь дэлхийн түвшний авьяастнуудыг тодруулж, Монголын балетын хөгжилд шинэ эрин нээх зорилготой бөгөөд олон улсын балетын мэргэжилтнүүдийг оролцуулсан, түүхэнд тэмдэглэгдэхүйц үйл явдал болж байгаа юм.
Уралдаанаас шалгарсан шилдэг бүжигчид энэ сарын 24-нд УДБЭТ-ын тайзнаа ганцхан удаа “Балетын гала” тоглолтоор үзэгчидтэйгээ уулзана. Энэ үдэш Монголын тайзан дээрээс дэлхийн балетын оддын түвшний бүжигчдийн уран чадварыг тольдох боломж үзэгчдийг хүлээж байна.
Тоглолт нь Монголын болон олон улсын балетын салбарын хамтын ажиллагааг өргөжүүлэх, шинэ үеийн авьяастнуудыг олонд таниулах, мэргэжлийн хөгжлийн дараагийн шатанд гаргах чухал алхам болж байгаагаараа онцлогтой.
