“BIGBANG” — амжилт ба уналтын хоёр тал

G-Dragon — Соёлын гавьяаны эзэн боллоо

К-попын домогт хамтлаг “BIGBANG”-ийн гишүүн G-Dragon Өмнөд Солонгосын соёл, урлагийн салбарын хамгийн нэр хүндтэй шагналуудын нэг болох Окгваны Соёлын гавьяаны одон-г хүртлээ. Энэ шагнал нь үндэсний соёлын хөгжилд онцгой хувь нэмэр оруулсан уран бүтээлчдэд олгодог бөгөөд G-Dragon энэхүү шагналыг хүртсэн хамгийн залуу уран бүтээлч болж байна.

Тэрээр “BIGBANG” хамтлагийн “Lies”, “Haru Haru”, “Bang Bang Bang” зэрэг олон хит дууны үг, аяыг бичиж, продюсерлэж, к-попын хөгжилд шинэ эрин нээсэн гэж үнэлэгддэг. Шагналаа гардан авахдаа тэр “Хүүхэд байхдаа дуучдыг биширдэг байсан. Өдгөө би өөрөө тэр оддын нэг болсондоо бахархаж байна. Энэ гавьяаг хамтлагийнхаа гишүүдтэй хуваалцмаар байна” хэмээн хэлжээ.

Seungri — маргаан, уналт, шүүмжлэл

Нөгөө талд, хамтлагийн гишүүн асан Seungri-ийн нэр маргаан, хэл амнаас салсангүй. 2019 онд “Burning Sun” шөнийн клубын хэрэгт холбогдсоноор тэрээр есөн төрлийн эрүүгийн хэрэгт буруутгагдаж, 18 сарын хорих ял эдэлсэн юм. Суллагдсан ч олон нийт түүнийг дахин хүлээн зөвшөөрөхөд бэлэн бус байна.

Саяхан Камбожид болсон арга хэмжээний үеэр Seungri хамтлагийн гишүүдийг оролцуулсан хошигнол хэлж, шүүмжлэлд өртжээ. Мөн түүний шинэ бизнес, гадаад дахь клубууд, хувийн харилцаа олон нийтийн анхаарлын төвд байсаар байна.

Харин “BIGBANG”-ийн 20 жилийн ой дөхөж буй энэ үед нэг хамтлагийн хоёр гишүүн — G-Dragon-ын оргилд хүрсэн амжилт ба Seungri-ийн уналт — К-попын түүхэнд “нэг зоосны хоёр тал”-ыг тод томруун харуулж байна.