Өнөөдөр дэлхийн алдарт BTS хамтлагийн ахлагч, реппер Ким Намжун (RM) төрсөн өдрөө тэмдэглэж байна. Тэрбээр 1994 оны есдүгээр сарын 12-нд БНСУ-ын Илсан хотод төрсөн бөгөөд энэ жил 31 нас хүрч байна.
Төрсөн өдрөө тохиолдуулан RM тус бүр 100 сая вон буюу нийт 200 сая воны хандивыг Сөүл хотын “Асан” эмнэлэг болон Корё их сургуулийн анагаахын төвд өргөжээ.
RM сэтгэгдэлдээ:
“Би төрсөн өдрөөрөө ямар нэг сайн үйлс хийхийг хүссэн. Миний хандив яаралтай эмчилгээ шаардлагатай мөртлөө санхүүгийн боломжгүй өвчтөнүүдэд бага ч гэсэн дэм болно гэж найдаж байна. Анагаах ухаан, эмнэлгийн салбарын хөгжилд хувь нэмрээ оруулах нь миний хувьд их чухал” хэмээн ярьсан байна.
“Асан” эмнэлгээс хандивыг эмзэг бүлгийн өвчтөнүүдийн эмчилгээ, хагалгааны зардалд ашиглана гэж мэдэгдсэн бол фенүүд нь RM-ийн санаачилгыг дэмжин төрөл бүрийн сайн үйлсийн аян өрнүүлж эхэлжээ.
Өнгөрсөн жил ч RM төрсөн өдрөөрөө Ахмадуудад туслах санд 100 сая вон хандивлаж байсан юм. Түүний энэхүү өгөөмөр сэтгэл нь зөвхөн хөгжмийн тайзан дээрх амжилтаараа бус, нийгмийн сайн сайхны төлөө үлгэр дууриал болж байгааг харуулж байна.
