“Call of Duty” тоглоомоос уран сайхны кино бүтээхээр болжээ

Америкийн алдарт “Paramount” студи дэлхийн хамгийн их борлуулалттай видео тоглоомуудын нэг болох “Call of Duty”-гоос сэдэвлэн тулаант уран сайхны кино хийхээ албан ёсоор мэдэгдлээ.

Paramount-ын шинэчлэлийн эхлэл

“Paramount” студийг саяхан програм хангамжийн салбараас гаралтай тэрбумтан Эллисоны гэр бүл худалдан авсан. “Oracle” компанийг үндэслэгч Ларри Эллисоны хүү Дэвид Эллисон өнгөрсөн сараас студийн удирдлагыг хүлээн авч, “Top Gun”, “The Godfather” зэрэг сонгодог бүтээлүүдийг хийж байсан боловч өдгөө хүндрэлтэй байгаа студийг дахин сэргээх үүргийг хүлээгээд байна.

Эллисон мэдэгдэхдээ:
“Call of Duty тоглоомын шүтэн бишрэгчийн хувьд энэ бол үнэхээр мөрөөдөл биелж буй хэрэг” хэмээн онцолжээ.

Дэлхийн рекорд тоглоом

• “Call of Duty” нь 2003 оноос хойш гарч эхэлсэн бөгөөд өнөөг хүртэл 30 гаруй цуврал гарсан.
• Тус тоглоомын нийт борлуулалт 500 сая хувь давсан нь түүхэндээ хамгийн өндөр үзүүлэлтүүдийн нэг юм.
• Сар бүрийн идэвхтэй тоглогчдын тоо 100 сая давж байна.
• Хамгийн сүүлийн бүтээл болох “Call of Duty: Black Ops 6” нь 2024 оны 6-р сард худалдаанд гарсан.

Activision ба Microsoft-ийн томоохон хэлцэл

“Call of Duty”-г бүтээдэг Activision-Blizzard компанийг 2023 онд Microsoft 69 тэрбум ам.доллароор худалдан авсан нь тоглоомын салбарын түүхэнд хамгийн том хэлцэл болсон.

Ирээдүйн кино төсөл

“Paramount” студи Activision-той байгуулсан гэрээний дагуу “Call of Duty”-гоос сэдэвлэсэн тулаант уран сайхны кино бүтээхээр болсон байна. Одоогоор гэрээний үнэ болон киноны тодорхой төлөвлөгөөний талаар дэлгэрэнгүй мэдээлэл өгөөгүй байна.