Холливүүдийн нэрт жүжигчин Кеану Ривс-ийн гэрээс хулгайлагдсан зургаан ширхэг бугуйн цагийг Чилийн цагдаагийн газар АНУ-ын Холбооны мөрдөх товчоонд (FBI) хүлээлгэн өгсөн тухайгаа албан ёсоор мэдэгджээ.
Ривсийн эдгээр цаг нь 2023 оны 12-р сард Лос-Анжелес дахь түүний гэрээс хулгайлагдсан бөгөөд өөрийнх нь эзэмшил болохыг тэрээр баталгаажуулсан байна. Энэ талаар Чилийн тал өчигдөр албан мэдэгдэлдээ дурдсан юм.
Бугуйн цагнуудын нийт үнэлгээ ойролцоогоор 125,000 ам.доллар хүрдэг бөгөөд тусгай ажиллагааны үеэр Чилийн нийслэл Сантьяго хотод олджээ. Чилийн мөрдөн байцаах албаны офицер Марсело Варас-ын мэдээлснээр, тус ажиллагааны хүрээнд мөн хулгайлагдсан автомашин, iPhone гар утас, тансаг зэрэглэлийн цүнх зэрэг эд зүйлсийг хураан авсан байна.
Энэхүү ажиллагаа нь АНУ-аас ирүүлсэн мэдээлэлд үндэслэсэн бөгөөд олны танил эрхмүүдийн гэр орон руу нэвтэрч хулгай хийдэг гэмт хэргийн бүлэглэлтэй холбоотой байжээ. Хохирогчдын дунд урлаг, спортын алдартнууд багтаж байгаа талаар Чилийн тал мэдээлсэн байна.
Мэдэгдлийг АНУ-ын хуучин дотоод хэргийн сайд Кристи Ноэм Чили улсад хийсэн айлчлалынхаа үеэр гаргасан бөгөөд хоёр улсын зүгээс үндэстэн дамнасан гэмт хэрэгтэй тэмцэх хамтын ажиллагаагаа улам бэхжүүлэхэд анхаарч ажиллахыг онцолжээ.
Тэрбээр өөрөө ч 2024 оны 4-р сард Вашингтон ДС-д байрлах ресторанд үйлчлүүлж байхдаа Чили улсын иргэн хэмээгдсэн этгээдийн хулгайн хэргээр хохирогч болсон туршлагатай аж. Тухайн үед түүний гар цүнхийг хулгайлсан хэргийг мөрдөн шалгаж байсан юм.
Хулгайлагдсан эд зүйлсийг ХМТ (FBI)-ын зохион байгуулалтаар эзэмшигчдэд нь буцаан өгөх ажил эхлээд байгаа бөгөөд Кеану Ривс ч мөн өөрийн үнэт зүйлсээ эргүүлэн хүлээн авах гэж байна.
