АНУ-ын ерөнхийлөгч Дональд Трамп-ын хэлснээр, реппер, продюсер Шон “Дидди” Комбс холбооны гэмт хэрэгт холбогдон шүүхээс оноосон ялд нь өршөөл хүссэн байна.
Трампын мэдэгдэл
Трамп 2025 оны аравдугаар сарын 6-нд (Даваа гаригт) өгсөн ярилцлагадаа “Дидди Комбс надаас өршөөл хүссэн хүмүүсийн нэг” хэмээн дурджээ. Тэрбээр мөн Жеффри Эпштейний хамтрагч Гислейн Максвеллийг өршөөж магадгүй талаар ярьсан бөгөөд “олон хүн өршөөл хүсэж байгаа” гэж нэмж хэлсэн байна.
Комбс 2024 онд бэлгийн мөлжлөгийн хэрэгт буруутай гэж үзэгдэн дөрвөн жилийн хорих ял авсан юм.
Өмгөөлөгчдийн хүсэлт ба Трампын байр суурь
Диддигийн өмгөөлөгч Николь Уэстморлэнд 2024 оны наймдугаар сард CNN-д өгсөн ярилцлагадаа “Бид өршөөлийн асуудлаар Трампын талтай холбогдсон” гэж мэдэгдэж байв. Гэсэн хэдий ч Трамп өмнө нь “Newsmax”-т өгсөн ярилцлагадаа түүнийг өршөөх магадлал маш бага гэдгийг онцолжээ.
“Би түүнтэй нөхөрсөг харилцаатай байсан, тэр дажгүй залуу. Гэхдээ би ерөнхийлөгчид нэр дэвших үед тэр надад маш дайсагнасан хандлагатай байсан. Энэ нь өршөөл үзүүлэхэд хүндрэлтэй болгож байна,” хэмээн Трамп хэлсэн байна.
Хорих анги шилжүүлэх хүсэлт
Комбсын өмгөөлөгчид мөн шүүгч Арун Субраманианд хүсэлт гаргаж, түүнийг Нью Жерсигийн Форт Дикс хот дахь аюул багатай холбооны хорих анги руу шилжүүлэхийг санал болгожээ. Тус хорих анги нь мансууруулах бодисын хамааралтай хүмүүст зориулсан сэргээн засах хөтөлбөр, гэр бүлийн уулзалт, нийгэмд дасан зохицох нөхцөлийг сайжруулах боломжийг олгодог гэж өмгөөлөгчид нь үзэж байна.
