55 настай хип хопын акул, хөгжмийн магнат Шон “Дидди” Комбсын шүүх хурал өнгөрсөн Лхагва гарагт болж, ялын хугацааг 10-р сард эцэслэн тогтоохоор болсон. Одоогоор тэр шоронд хоригдож байгаа ч, рекет болон бэлгийн наймааны үндэслэлтэй хэргүүдээс цагаатгагдсан юм.
Гэсэн ч шүүхийн асуудал түүнд хүндхэн цохилт өгсөн бөгөөд Комбсын бизнесийн эзэнт гүрэн нэгэнт л доройтож эхэлсэн байна. Түүнийг баривчлагдахаас өмнө ч томоохон төслүүд нь дампуурлын ирмэгт хүрч байв. Тухайлбал, тэрбээр өөрийн үүсгэн байгуулсан “Revolt TV” сувгийн удирдлагын албан тушаалаасаа бууж, “Hulu”-гийн реалити шоуны гэрээгээ алдсан. Мөн дуучин Кэсси Вентуратай холбоотой хүчирхийллийн бичлэг ил болсны дараа Нью-Йорк хот түүний нэрэмжит өргөмжлөлийг цуцалж, “Peloton” спортын компани түүний дуунуудыг ашиглахаа больсон. Үүний зэрэгцээ, Ховардын их сургууль болон Харлем дахь нэгэн сургууль түүнтэй холбоотой бүх харилцаагаа тасалсан байна.
Хэдий “Bad Boy Records” хөгжмийн лейбл нь албан ёсоор хаагдаагүй ч, Комбсын нэр шүүх, эрүүгийн хэргүүдтэй хамааралтай хэвээр байгаа нь энэ салбарын бизнесийн ирээдүйд итгэл төрүүлэхгүй байгаа аж. Ирээдүйн ямар нэгэн шинэ төсөл, санаачилга, хөгжмийн бүтээлийн талаар одоогоор ямар ч мэдээлэл байхгүй байна.
Гэсэн ч Комбсын уран бүтээлүүд хөгжмийн платформууд дээр алга болоогүй хэвээр. “Spotify”, “Apple Music”, “Amazon Music” зэрэг томоохон стриминг үйлчилгээнүүд дээр түүний дуунууд эгшиглэсээр байна. Хачирхалтай нь, 2025 оны 4-5 дугаар саруудад түүний бүтээлийн стриминг үзүүлэлт АНУ-д 20 хувиар өссөн байгаа нь сонирхол татаж буй үзүүлэлт юм.
