Америкийн поп хөгжим, кино урлагийн домогт төлөөлөгчдийн нэг, дуучин болон жүжигчин Конни Фрэнсис 87 насандаа хорвоог орхисон талаар түүний уран бүтээлийг хариуцдаг “Concetta Records” лэйбл албан ёсоор мэдээллээ. Уг мэдэгдлийг түүний ойрын найз, лэйблийн ерөнхийлөгч Рон Робертс 2025 оны долдугаар сарын 17-ны Лхагва гарагийн орой дуучны болон өөрийн фэйсбүүк хуудсаар дамжуулан олон нийтэд хүргэсэн байна.
Хэдийгээр нас барах шалтгааныг тодорхой дурдаагүй ч, сүүлийн саруудад Конни Фрэнсис ташааны өвчнөөр шаналж, эмчилгээ хийлгэж байсан тухайгаа фэнүүдтэйгээ хуваалцаж байжээ. Тэрээр энэ оны эхээр өвдөлт нэмэгдсэн шалтгаанаар эмнэлэгт хэвтэн эмчлүүлж байсан гэдгийг ойр дотныхон нь мөн дурдсан байна.
Авьяастай охиноос попын домог хүртэл
Конни Фрэнсис нь 1937 онд Нью Жерси мужийн Ньюарк хотод Кончетта Франконеро нэртэйгээр мэндэлсэн. Багаасаа хөгжмийн онцгой авьяастай байсан бөгөөд аав нь түүний авьяасыг дэмжин, дөрөвхөн настайгаас нь урлагийн уралдаан, тэмцээнүүдэд оролцуулж байжээ. Тэрээр 1950-иад оны дунд үеэс “Конни Фрэнсис” нэрээр уран бүтээлээ туурвиж эхэлсэн юм.
Түүний карьерын оргил үе 1960-аад оны эхэнд тохиосон бөгөөд “Everybody’s Somebody’s Fool”, “My Heart Has A Mind Of Its Own”, “Don’t Break The Heart That Loves You” зэрэг дуу нь Billboard жагсаалтыг тэргүүлж байв. Тэрбээр Billboard Hot 100 жагсаалтад хамгийн олон удаа хит дуутай байж чадсан анхны эмэгтэй уран бүтээлч гэдгээрээ түүхэнд бичигддэг.
Карьерын уналт, дахин сэргэлт
1970-аад оноос Фрэнсисийн урлагийн амжилт алгуур буурсан ч тэр уран бүтээлээ орхилгүй тууштай үргэлжлүүлсээр байсан. Тэрээр 2018 онд урлагийн тайзнаас зодог тайлж байгаагаа зарласан бөгөөд түүнийг фэнүүд нь халуун дотноор үдсэн билээ.
Гэвч 2025 онд түүний 1962 онд гаргасан “Pretty Little Baby” дуу TikTok платформоор дамжин дахин алдаршиж, шинэ үеийн сонсогчдын талархлыг хүлээсэн нь түүний уран бүтээлийн үнэ цэнийг дахин баталсан үйл явдал болсон юм.
Конни Фрэнсис олон арван жилийн турш хөгжмийн ертөнцөд үнэт хувь нэмрээ оруулж, үе үеийн сонсогчдын сэтгэл зүрхэнд мөнхөрсөн билээ.
