Соёлын наадмын онцлох үйл явдал
Дорноговь аймгийн ЗДТГ-аас Их соён гэгээрүүлэгч, говийн V дүрийн ноён хутагт Дулдуйтын Данзанравжаагийн амьдрал, уран бүтээлээс сэдэвлэсэн “Тэнгэрийн хутагт” фестиваль-ийг есдүгээр сарын 19-20-нд Хамарын хийдийн ойролцоо зохион байгууллаа. Энэхүү фестиваль нь “Аялал жуулчлалыг дэмжих жил”-ийн хүрээнд болсон бөгөөд нутгийн ард иргэд, жуулчдад зориулсан соёл, урлагийн өргөн арга хэмжээг багтаав.
Урлаг, соёлын хөтөлбөр
Наадмын үеэр “Тэнгэрийн хутагт”, “Үлэмжийн чанар”, “Өвгөн суварга” гэсэн гурван тайз засч, олон төрлийн урлаг, соёлын арга хэмжээг үзэгчдэд хүргэлээ. “Тэнгэрийн хутагт” тайзнаа Үндэсний Урлагийн Их театрын жүжигчид “Тэнгэрийн хутагт” бүжгэн жүжиг, Морин хуурын чуулгын тоглолт, “Саран хөхөө” театрын уран бүтээлчид “Дорнын цадиг” бүтээлээ толилуулсан бол “Өвгөн суварга” тайзанд “Үлэмжийн чанар” яруу найргийн наадам, Хамарын хийдийн хурал, өглөөний уншлага, Лувсанданзанравжаагийн бүтээсэн ая, маани уншлага, говийн IX дүрийн ноён хутагтын айлтгал өрнөв. Харин “Үлэмжийн чанар” тайзанд нарны мөргөл, нутгийн түүх, хөгжмийн засал, бясалгал, аз жаргалын тухай хэлэлцүүлэг зохион байгуулагдлаа.
Үзэсгэлэн, аялал жуулчлалын үйлчилгээ
Фестивалийн үеэр говийн тэнгэр, од эрхсийг дурандаж харах үйлчилгээ, Дорноговь аймгийн гэрэл зурагчдын “Дорнын говийн тусгал” гэрэл зургийн үзэсгэлэн, аймгийн 14 сумын онцлогийг харуулсан “Өв соёлын өргөө” гэр үзэсгэлэн, монгол наадгай, язгуур урлагийн тоглолт, монгол бичгийн уран бичлэгийн үзүүлбэр зэргийг оролцогчдод хүргэлээ. Мөн морь, тэмээ унах үйлчилгээ, нутгийн брэнд бүтээгдэхүүний худалдаа зохион байгуулагдсан нь жуулчдын сонирхлыг ихэд татсан юм.
Түүхэн ач холбогдол
Дорноговь аймаг бол Их соён гэгээрүүлэгч Данзанравжаагийн төрсөн нутаг бөгөөд түүний бүтээж туурвиж байсан Хамарын хийд, Энергийн төв, Ханбаянзүрх хайрхан зэрэг ариун газар нь өнөөдөр ч хадгалагдан үлдсэн байдаг. Энэ нь бүс нутагт тулгуурласан соёлын аялал жуулчлалыг хөгжүүлэх өргөн боломж байгааг харуулж байна.
Бүжгэн жүжгийн тухай
“Тэнгэрийн хутагт” бүжгэн жүжгийг анх 2023 онд Ноён хутагтын мэндэлсний 220 жилийн ойгоор олон нийтэд хүргэж байсан. Тухайн бүтээлийн хөгжмийг МУГЗ Ш.Өлзийбаяр, цомнолыг МУСГЗ Л.Эрдэнэбат бичиж, ерөнхий найруулагч, бүжиг дэглээчээр СТА Х.Хашхүү, ерөнхий зураачаар МУЭ-ийн гишүүн зураач Д.Ганпүрэв ажиллажээ.
