Дуучин Кэти Перри болон Канадын ерөнхий сайд асан Жастин Трюдо нарын хамт дарвуулт завиар аялж байгаа зураг цахим орчинд шуугиан тарив. Санта Барбарагийн эргийн ойролцоо авсан энэхүү зурагт тэд бие биенээ тэвэрч, үнсэж буй мэт харагдаж байгаа нь олон нийтийн анхаарлыг ихэд татлаа.
Хоорондын харилцаа уу, эсвэл зүгээр нэг уулзалт уу?
Тэдний төлөөлөгч нар зураг болон харилцааны талаар PEOPLE сэтгүүлд ямар ч тайлбар өгөөгүй байна. Гэхдээ тус сэтгүүл мэдээлэхдээ, Перри ба Трюдо нар өнгөрсөн долдугаар сард нохой хамт салхилуулж уулзсан, мөн Монреалийн “Le Violon” ресторанд хамт оройн зоог барьсан хэмээн мэдээлжээ.
Тухайн үед Кэти Перри хуучин сүйт залуу, жүжигчин Орландо Блум-ээс салснаа зарлаад удаагүй байсан бөгөөд тэд Даиси Дов Блум нэртэй таван настай охинтой.
Харин 53 настай Жастин Трюдо эхнэр Софи Грегуар Трюдо-гоос 18 жил хамт амьдарсны дараа 2023 онд салсан бөгөөд тэд гурван хүүхэдтэй билээ.
Олны анхаарлыг татсан хамт байх мөчүүд
Трюдо саяхан Монреалийн “Bell Centre”-т болсон Кэти Перригийн “Lifetime” тоглолтыг үзэж яваа нь дахин олны анхаарлыг татсан байна. Үүний дараагаас хойш тэд илүү ойр харилцах болсон талаар PEOPLE сэтгүүлд эх сурвалж дурджээ.
“Тэд нэг нэгэндээ татагдаж байгаа нь мэдрэгддэг, харилцаа хаашаа чиглэхийг хэлэхэд эрт байна. Кэти дэлхийгээр аялж байгаа бол Трюдо улс төрөөс хойш амьдралаа дахин цэгцэлж байна. Тэдний хооронд нийтлэг зүйл олон бий” гэж эх сурвалж хэлсэн байна.
Мөн тэрээр “Хоёул өмнөх амьдралдаа гэр бүлтэй байсан хүмүүс тул эцэг эхийн үүргээ ухамсарладаг. Холын зайд харилцах нь хэцүү ч боломжгүй зүйл биш” гэж нэмжээ.
Гэхдээ хоёр дахь эх сурвалжийн үг өөр
Гэсэн хэдий ч өөр нэгэн эх сурвалж PEOPLE сэтгүүлд өгсөн ярилцлагадаа “Тэд зүгээр л танилцаж, нөхөрсөг уулзалт хийсэн. Кэтигийн хувьд одоогоор болзох нь чухал биш байна. Тэд холбоотой хэвээр байгаа ч дахин уулзахаар төлөвлөөгүй” гэжээ.
