Улсын дуурь, бүжгийн эрдмийн театрын 63 дахь улирлын нээлт энэ долоо хоногт албан ёсоор эхэлж байна. Шинэ улирлыг өмнөх жилүүдээс ялгарах онцлогтойгоор, хөгжмийн уран бүтээлчдийн «Orchestra Night-III» тоглолтоор нээх болсныг театрын зүгээс онцолжээ.
Хөгжмийн тоглолтоор улирлаа эхлүүлж буй онцлог
Театрын захирал Д.Алтанхуягын хэлснээр, энэ улирлын эхлэл хөгжмийн тоглолтоор эхэлж байгаа нь онцгой бөгөөд урьд өмнө ийм байдлаар улирлаа эхлүүлж байгаагүй аж. «Orchestra Night-III» тоглолт есдүгээр сарын 27, 28-нд болох бөгөөд Франц, Италийн уран бүтээлчид оролцоно. Эхний өдөр Францын хөгжмийн бүтээлүүд эгшиглэх бол хоёр дахь өдөр нь Монгол, Италийн хөгжмийн зохиолчдын бүтээлүүдийг толилуулах юм.
Үзэгчдийн дунд урьдчилсан билетийн хямдралтай борлуулалт амжилттай явагдсан талаар театрын удирдлагууд мэдээлж, үзэгчдийн идэвхтэй оролцоонд талархал илэрхийлжээ.
Дуурийн нээлт «Гүн гэрийн гүнж» бүтээлээр хийгдэнэ
Аравдугаар сарын 4, 5-ны өдрүүдэд Ц.Нацагдоржийн “Гүн гэрийн гүнж” дууриар дуурийн шинэ улирлыг нээхээр төлөвлөжээ. Энэ нь Төрийн шагналт хөгжмийн зохиолчийн 75 насны ойтой давхцаж буйгаараа утга төгс болж байна. Түүнчлэн Б.Дамдинсүрэн, Б.Смирнов нарын «Учиртай гурван толгой» дуурь аравдугаар сард, харин Ж.Пуччинийн “Богема”, Ж.Россинигийн “Севилийн үсчин” дууриуд арваннэгдүгээр сард тоглогдох юм.
Улирлын хаалтын дуурийг мөн “Богема”-аар хийхээр шийдвэрлэсэн нь олон улсын сонгодог урлагт чиглэсэн бодлогын нэг хэсэг гэж театрын зүгээс тайлбарлалаа.
“Хунт нуур”-ын 50 жилийн ойн тоглолтууд хийгдэнэ
Энэ улирлын балетын онцлох бүтээл бол П.И.Чайковскийн “Хунт нуур” балет. Энэхүү бүтээлийг Монголын тайзнаа анх тоглосны 50 жилийн ой энэ онд тохиож байгаа бөгөөд үүнийг тохиолдуулан “Хунт нуур”-ыг нийт зургаан удаа тоглохоор хөтөлбөрт багтаажээ.
Үүнээс гадна А.Аданын “Жизель” балет арваннэгдүгээр сард гурван удаа, шинэ жилийн баярт зориулсан П.И.Чайковскийн “Цөмөөхэй” балет арванхоёрдугаар сард тоглогдохоор төлөвлөгдсөн байна.
