Шинэ продакшны анхны бүтээл
“Фантастик” продакшны жүжигчин Э.Алдар болон “Маск” продакшны жүжигчин Ц.Ганзориг нар хамтран “Ai production”-ыг байгуулжээ. Тус продакшны хамгийн эхний уран бүтээл болох “Тэг цэг үйлдэл” уран сайхны кино маргааш буюу 2025 оны аравдугаар сарын 3-наас эхлэн бүх кинотеатраар нээлтээ хийх гэж байна.
Найруулагчийн замнал
Киноны найруулагчаар ажилласан Э.Алдар нь 2007 онд СУИС-ийг жүжигчний мэргэжлээр төгсөж, уран бүтээлийн гараагаа “Өнгөт инээд”, “Х-ТҮЦ”, “Захиалгат инээд” зэрэг хошин урлагийн хамтлагийн тоглолтоор эхэлсэн. Тэрээр 2007-2016 онд “Маск” продакшнд жүжигчнээр, 2008 оноос “Фантастик” продакшнд жүжигчин, найруулагч, зохиолчоор ажилласан туршлагатай.
2017 онд тэрээр “One night” инээдмийн уран сайхны киног зохиож, найруулсан бол энэ удаа илүү өвөрмөц өнгө төрх, содон сэдэвтэй шинэ бүтээлээрээ үзэгчдийн хүртээл болж байна.
Гол дүрүүд ба утга санаа
“Тэг цэг үйлдэл” кинонд жүжигчин С.Ариунбямба, У.Уянга, М.Төгөлдөр нар гол дүрийг бүтээжээ. Киноны гол санаа нь: амьдрал үргэлжилж, цаг хугацаа урагшилсан ч бүхий л зүйл тэг цэгээс эхэлдэг, харин бүх уулзвар, сонголт, амьдралын мөчүүдийн суурь нь “Тэг цэг” байдаг гэсэн философи дээр тулгуурлажээ.
