Мэргэжлийн бүжигчин, ОУХМ Э.Түвшинзаяа “Ододтой бүжиглэе” шоуны хоёр улиралд оролцон, өөрийн авьяас чадвар, заах арга барилаараа олон хүний хүндэтгэлийг хүлээсэн. СУИС-ийг бүжгийн багш мэргэжлээр төгссөн тэрээр 13 жилийн турш бүжгээр тасралтгүй хичээллэж, «Moon Dance» клубын гишүүнээр олон улсын тэмцээнд оролцож иржээ.
Тэрээр бүжгээр мэргэшиж, өөрийн гэсэн студи байгуулна хэмээн оюутан ахуй цагаасаа мөрөөдөж, энэ мэргэжлээр амьдралаа авч явах бүрэн боломжтой гэдгийг батлан харуулж яваа нэгэн. Түүний хувьд бүжиг зөвхөн урлаг биш, харин сэтгэлзүйн амралт, өөрийгөө олж мэдрэх нэг арга гэж тодорхойлсон юм.
“Ододтой бүжиглэе” шоу нэвтрүүлэгт оролцсоноор олон нийтэд илүү танигдаж, бүжиг заалгах хүсэлтэй хүмүүсийн тоо эрс нэмэгдсэн. Тэрээр өмнөх улиралд хамтрагч дуучин Д.Намсрайноровыг амжилттай бүжиглүүлж чадсан нь “Намсрайноровыг чадсан юм чинь намайг ч чадна биз дээ” гэх олон хүний итгэлийг төрүүлсэн хэмээн хошигнон дурслаа. Харин энэ жилийн улиралд Э.Одбаяртай хамтарч, бүжгийн ур чадвараа бүрэн илэрхийлж чадсан гэдгээ ч онцолсон.
Шоуны ард тайзны амьдрал, бэлтгэлийн хүнд нөхцөл, тэвчээр, шантралын тухай тэрээр “Ядрал, зөрчилдөөн байсан ч хамтрагчийн маань эерэг хандлага, миний дуртай зүйлээ хийж байгаа сэтгэлээс шалтгаалаад бүхнийг даван туулсан” хэмээн ярьсан юм.
Э.Түвшинзаяа бүжгийн спортыг хүний биед үзүүлэх үр дүн, сэтгэл санааны тайвшралын тухайд “Бүжиг бол тархийг амраах хамгийн гоё арга. Зөвхөн өөр дээрээ төвлөрдөг, сэтгэлзүйн цэвэршилт өгдөг” гэж хэлсэн нь түүний мэргэжилдээ хандах хүндлэл, хайр сэтгэлийг илэрхийлж байв.
