Боловсролын ерөнхий газраас 2024–2025 оны хичээлийн жилд хэрэгжих “Улсын олимпиад зохион байгуулах журам”-ыг албан ёсоор баталлаа.
Олимпиад зохион байгуулах бүтэц, зохицуулалт
Шинэ журмаар улсын олимпиад зохион байгуулах эрх бүхий байгууллагыг Ерөнхий хороо болон Дэд хороо байхаар тогтоожээ. Энэхүү бүтэц нь олимпиадын зохион байгуулалтыг илүү үр дүнтэй, хариуцлагатай байлгах зорилготой юм.
Хурлын үр дүн, хуваарийн баталгаа
Олимпиадын Ерөнхий хороо энэ оны наймдугаар сард хуралдаж, өнгөрсөн хичээлийн жилийн улсын болон олон улсын олимпиадын үр дүн, туршлага, сайжруулах шаардлагуудыг хэлэлцсэн байна. Хурлаар 2024–2025 оны хичээлийн жилийн улсын олимпиадын хуваарийн товыг тогтоон, Боловсролын сайдад танилцуулж, яамны дэмжлэгтэйгээр албан ёсоор баталжээ.
Энэ шийдвэр нь улсын олимпиадуудыг илүү төлөвлөгөөтэй, уялдаа холбоотой зохион байгуулах, сурагчдын оролцоог дэмжих, чанарыг ахиулах чухал алхам боллоо.
