Австрийн нийслэл Вена хот 2026 оны “Eurovision” олон улсын дууны наадмыг хүлээн авах эрхтэй боллоо. Энэ тухай тус улсын үндэсний телевиз болох ÖRF мэдээлэхдээ, Вена нь өрсөлдөгч Инсбрук хотыг ялж сонгогдсон гэжээ. Тус тэмцээн өмнө нь 1967, 2015 онд Венад болж байсан бол ирэх жил гурав дахь удаагаа зохион байгуулагдах юм.
Энэ оны тавдугаар сард Австрийн дуучин Ж.Ж “Wasted Love” дуугаараа түрүүлснээр Австри улс 70 дахь удаагийн “Eurovision”-ыг зохион байгуулах эрхээ авсан билээ. Тэмцээний финалыг нийслэлийн хамгийн том битүү дээвэртэй байгууламж болох “Wiener Stadthalle” цэнгэлдэх хүрээлэнд хийхээр төлөвлөжээ.
1955 онд Швейцарын Лугано хотод анх зохиогдсоноос хойш “Eurovision” нь дэлхийд хамгийн нэр хүндтэй поп хөгжмийн наадмуудын нэг болон хөгжсөн. Энэхүү уралдаан ABBA, Селин Дион, Оливиа Ньютон-Жон зэрэг өнөөдөр дэлхийд танигдсан уран бүтээлчдийн урлагийн замналыг эхлүүлэхэд чухал түлхэц өгч байв.
Өнгөрсөн жил Швейцарын Базель хотод болсон тэмцээн нь гайхамшигтай тайз засал, хувцаслалт, үзүүлбэрээрээ онцгойрч, 166 сая үзэгчийг шууд дамжуулалтаар татсан байна. Ялагчийг олон нийтийн санал хураалт болон мэргэжлийн шүүгчдийн нийлмэл үнэлгээгээр тодруулдаг уламжлалтай.
1 comment
Eurovision-ий тайз засал, хувцаслалтад жил бүр гайхдаг. 2026 онд Вена дээр бүр ч том шоу болно гэдэгт итгэлтэй байна