24
2025 оны 5 дугаар сарын 17-ны Бямба гарагт Европын өдөрлөг Үндэсний цэцэрлэгт хүрээлэнд болох гэж байна. Европын Холбооны гишүүн улс орнуудын соёл, боловсрол, аялал жуулчлал, бизнесийн салбарыг танилцуулах энэхүү өдөрлөг олон нийтэд үнэ төлбөргүй, чөлөөтэй нээлттэй юм.
Европын өдөрлөгөөр дараах боломжууд хүлээж байна:
- Европын орны соёл, уламжлалтай танилцах
Үзэсгэлэнгийн хүрээнд Европын орнуудын уламжлалт хоол хүнс, гар урлал, соёлын үзүүлбэрүүдийг сонирхох боломжтой. - 70 гаруй асарт мэдээлэл авах
Европын Холбооны төлөөлөгчийн газар болон гишүүн орнуудын Элчин сайдын яамд, соёл боловсролын байгууллагууд, бизнесийн төлөөллүүд, Европын Холбооны санхүүжилтээр хэрэгжиж буй төсөл, хөтөлбөрүүдийн талаарх мэдээллийг авах боломжтой. - Боловсролын боломжуудтай танилцах
Европт суралцах сонирхолтой хүмүүст зориулсан тэтгэлэг, сургалтын талаарх дэлгэрэнгүй мэдээллийг хүргэхээс гадна Эрасмус+ хөтөлбөрийн төгсөгчидтэй уулзаж, тэдний туршлагаас хуваалцах боломжтой. - Шенгений визийн зөвлөгөө, аяллын мэдээлэл
Европ руу аялахаар төлөвлөж буй хүмүүст зориулсан визийн талаарх зөвлөгөө, хэрэгцээт мэдээлэл өгөх цэг ажиллана.
Үндсэн мэдээлэл:
- Хаана: Үндэсний цэцэрлэгт хүрээлэн
- Хэзээ: 2025 оны 5-р сарын 17, Бямба гарагт 11:00–18:00 цагийн хооронд
- Нэвтрэх нөхцөл: Хүн бүрт нээлттэй, үнэ төлбөргүй
Европын соёлоор аялах нэг өдрийн боломжийг алдалгүй, гэр бүл, найз нөхөдтэйгөө хамт энэ бямба гарагт Үндэсний цэцэрлэгт хүрээлэнг зориорой.
