Израилийг хасах асуудал яригдаж эхэллээ
Европын өргөн нэвтрүүлгийн холбоо (EBU)-ны гишүүд ирэх арваннэгдүгээр сард Израилийн Евровидение 2026-д оролцох эсэхийг шийдэх санал хураалт явуулахаар боллоо.
Израилийн олон нийтийн нэвтрүүлэгч Кан Газын зурваст хийж буй цэргийн ажиллагаатай холбоотойгоор хүчтэй шахалттай тулгарч байгаа бөгөөд зарим улс Израилийг тэмцээнээс хасах шаардлагатай гэж үзэж байна. Ирландын RTÉ бүр “хэрэв Израиль Австрийн Вена хотод оролцвол бид тэмцээнд оролцохгүй” хэмээн мэдэгдсэн нь шуугиан дэгдээв.
EBU-ийн байр суурь
EBU-ийн ерөнхийлөгч Делфин Эрнотте-Кунси гишүүдэд илгээсэн захидалдаа Израилийн оролцооны талаар урьд өмнө байгаагүй олон талт үзэл бодол үүссэн тул илүү өргөн, ардчилсан шийдвэр гаргах шаардлагатайг онцолжээ.
EBU мэдэгдэлдээ:
- Израилийн оролцоог шийдэх санал хураалт 11-р сарын эхээр онлайнаар зохион байгуулагдах ерөнхий чуулганы ээлжит бус хурлаар явагдана.
- ЕБХ-ны дүрэмд зааснаар ийм шийдвэр гаргахад гишүүдийн 75%-ийн онцгой олонхийн санал шаардлагатай.
- Евровидение нь улс төрөөс ангид, зөвхөн хөгжим, соёлын баяр байх ёстой гэсэн байр суурь хэвээр байна.
Израилийн байр суурь
Израилийн олон нийтийн нэвтрүүлэгч Кан Евровидение-г “соёлын болон улс төрийн бус өвөрмөц наадам” хэвээр үлдэхийг хүсэж буйгаа илэрхийлжээ. Тэдний хэлснээр Израиль олон жилийн турш тэмцээний нэр хүндтэй оролцогч байсан бөгөөд хасагдах нь 70 дахь удаагийн тэмцээний эв нэгдэл, нөхөрлөлийн бэлгэдэлд сөргөөр нөлөөлнө гэжээ.
BBC болон бусад нөлөө бүхий гишүүдийн байр суурь
EBU-ийн гол дэмжигчдийн нэг BBC нэмэлт тайлбар хийхээс татгалзсан ч “сүүлийн өдрүүдэд олон янзын үзэл бодол, санаа зовнил үүсэж буйг бид мэдэж байна” хэмээн мэдээлэв. Тэд Евровидение улс төрөөр удирдуулдаггүй бөгөөд олон орныг хөгжим, соёлын дор нэгтгэдэг уламжлалт наадам хэвээр байх ёстойг дахин тодотгосон.
