2001 онд дэлгэцнээ гарсан Тайванийн алдарт “Meteor Garden” буюу “Солирын од” телевизийн цувралаар алдаршсан F4 хэмээх хөвгүүдийн хамтлаг олон жилийн дараа бүрэн бүрэлдэхүүнээрээ тайзнаа гарч, шүтэн бишрэгчдэдээ гэнэтийн бэлэг барьлаа.
Жерри Ян, Ванесс Ву, Вик Чоу, Кен Чу нар өнгөрсөн бямба гарагт Тайванийн “Mayday” рок хамтлагийн тоглолтын үеэр тайзнаа гэнэтийн байдлаар гарч ирэн, “Meteor Rain” нэртэй алдарт дуугаараа үзэгчдийн зүрх сэтгэлийг хөдөлгөжээ. Тоглолт Тайпэй Арена цогцолборт зохион байгуулагдсан бөгөөд 40 мянган үзэгч хамт дуулан, тэр мөчийг мартагдашгүй болгосон байна.
Энэ гэнэтийн тоглолт нь зөвхөн F4-ийн бүрэн бүрэлдэхүүнээрээ дахин нэг тайзнаа гарч ирсэн онцгой үйл явдал байгаад зогсохгүй, 2025 оны 2-р сард уушгины хатгалгаа өвчнөөр таалал төгссөн жүжигчин Барби Шу-г дурсан санасан хүндэтгэл байсан юм. Барби Шу нь “Meteor Garden” цувралын гол дүр болох Сан Цай-гийн дүрийг бүтээж, F4 хамтлагийн гишүүдийн хамт Азийн олон орны үзэгчдийн сэтгэлийг эзэмдсэн билээ.
F4 хамтлагийн үүсэл нь Японы алдарт “Boys Over Flowers” мангад суурилсан “Meteor Garden” телевизийн цувралтай шууд холбоотой. Уг цуврал Тайванд анх бүтээгдсэн ч 2005 онд Японд, 2008 онд Хятадад, 2009 онд Өмнөд Солонгост, 2021 онд Тайландад дахин бүтээгдэж, бүс нутгийн соёлд томоохон нөлөө үзүүлсэн юм.
2009 онд тараад байсан F4 хамтлагийг дахин нэгтгэж, тайзнаа гаргах санаачилгыг хэрэгжүүлэхэд олон жилийн хугацаа зарцуулсан талаар “Mayday” хамтлагийн ахлагч Ashin дурссан байна. Тэрээр энэхүү үйл явдлыг хамтын дурсамж, уран бүтээлийн үнэ цэнийг хүндэлсэн, түүхэн мөч хэмээн онцолжээ.
F4 хамтлагийг эргэн нэгдэхийг хүссэн шүтэн бишрэгчдийн хүсэлт өдийг хүртэл тасраагүй бөгөөд Тайванийн хэвлэл мэдээллээр тэднийг ирэх онд 25 жилийн ойгоо тэмдэглэн, бүрэн хэмжээний тоглолт хийнэ гэсэн мэдээлэл цацагдаж буй. Гэсэн ч одоогоор хамтлаг болон тэдний төлөөлөгч агентлаг энэ мэдээллийг баталгаажаагүй байна.
