“The Voice of Mongolia” шоуны гуравдугаар улирлын ялагч Г.Даваадалай дэлхийн өнцөг булан бүрээс ирсэн шилдэг залуу дуучидтай нэгэн тайзан дээр өрсөлдөж, Монгол Улсаа “Sing! Asia” нэртэй олон улсын хэмжээний шоу тэмцээнд төлөөлөн оролцож байна.
Тус тэмцээн нь Хятадын алдарт iQIYI стриминг платформ дээр долоо хоног бүр цацагдаж буй бөгөөд Хятад, Япон, Малайз, Тайланд зэрэг есөн улсын нийт 32 авьяаслаг оролцогчийг нэгтгэжээ. Тэднийг дэлхийд нэр хүндтэй дуучид болох Их Британийн Жесси Жей, Тайванийн Жефф Чанг, Хятадын Жэйн Жан, Малайзын Азора Чин нар удирдан чиглүүлж байгаа нь шоуны цар хүрээг илтгэнэ.
“Sing! Asia” шоуны хамгийн онцгой зүйл нь тэмцээний зураг авалт далайн тансаг аяллын хөлөг дээр явагдаж буй явдал юм. Тэмцээний оролцогчид Шанхай, Окинава, Ха Лонг Бэй, Сингапур, Кланг зэрэг үзэсгэлэнт газраар аялж, эцэст нь Хонконг хотод хүрэхээр төлөвлөсөн байна.
Монголын төлөөлөл болсон Г.Даваадалай эхний шатанд Хурд хамтлагийн “Аавдаа би хайртай” дууг дуулан, үзэгчдийн сэтгэлд гүн хүрсэн гүйцэтгэл үзүүлжээ. Түүний энэ тоглолт нь олон улсын үзэгчдийн дунд сэтгэл хөдөлгөм, эх оронч өнгө аястайгаар онцлогдож, Монголын соёл, дуу хөгжмийн өвийг дэлхий дахинд таниулсан чухал агшин болсон юм.
Тус шоу нь зөвхөн авьяас шалгаруулах тэмцээн төдий биш, харин залуу уран бүтээлчдийн хоорондын хамтын ажиллагаа, соёлын солилцоо, урам зоригийн талбар болж байгаагаараа онцлог юм.
