Өмнөд Солонгосын алдарт дуучин G-Dragon өсвөр насныхны архины хамаарлыг эмчлэх, сэтгэл заслын үйлчилгээ үзүүлэх зорилгоор нийт 880 сая вон хандивлажээ. Энэхүү тусламжийг Сөүл хотын Үндэсний сэтгэцийн эрүүл мэндийн төв зэрэг холбогдох байгууллагуудаар дамжуулан хүргүүлсэн байна.
Хандивын хөрөнгө нь архинд донтсон өсвөр үеийн хүүхдүүдэд зориулсан эмчилгээ, сэтгэл заслын хөтөлбөрүүдийг хэрэгжүүлэх, мөн нөхөн сэргээх төвүүдийн үйл ажиллагааг дэмжихэд чиглэгдэнэ.
G-Dragon өөрийн энэхүү үйлдлийн талаар “Өсвөр үеийнхэн хамгийн эмзэг насан дээрээ олон сэтгэл зүйн дарамтад өртдөг. Тэдний төлөө бага ч атугай дэмжлэг үзүүлэхийг хүссэн” хэмээн хэлжээ.
Тэрбээр өмнө нь ч хүүхэд, өсвөр насныхны боловсрол, эрүүл мэндийн салбарт олон удаа хандив өргөж, буяны үйл ажиллагаанд тогтмол оролцож ирсэн. Энэ удаагийн хандив нь түүний нийгмийн өмнө хүлээсэн үүргээ ухамсарласан, чин сэтгэлийн тус дэмийн илэрхийлэл болж байна.
