Гэрч: Дидди экс найз бүсгүйгээ шалаар чирсэн

Гэрчийн мэдүүлгээр Дидди экс найз охиноо зодож, шалаар чирсэн гэх хэрэг шүүх дээр хэлэлцэгдэж эхэллээ
Америкийн хөгжмийн ертөнцийн нэр нөлөө бүхий продюсер, бизнесмэн Шон “Дидди” Кумбсын эсрэг гаргасан хүчирхийллийн хэргийн шүүх хурал 2025 оны тавдугаар сарын 12-нд албан ёсоор эхэллээ. Хурлын эхний өдөр гэрчээр оролцсон Даниел Филлипс шүүхэд мэдүүлэг өгч, Дидди өөрийн экс найз бүсгүй Кассандра Вентураг архины шил шидэж, шалаар чирсэн гэж мэдүүлжээ.

Гэрч Филлипсийн хэлснээр, Кумбс тухайн үед зочид буудлаас гарсны дараа Вентура маш их айдаст автсан, бие нь чичирч байсан гэж тэмдэглэсэн байна. Тэрбээр 12 тангарагтны өмнө “Тэр үнэхээр сандарч, биеийн байдал нь тогтворгүй байсан” хэмээн мэдүүлжээ.

Шон Кумбс одоогоор бэлгийн мөлжлөг, хүнийг хүчээр бие үнэлэлтэд оролцуулсан, бэлгийн хүчирхийлэл, хар тамхины хэрэглээ зэрэг олон хүнд эрүүгийн зүйл ангиудаар буруутгагдаж байгаа юм. Прокуроруудын мэдээлснээр тэр эмэгтэйчүүдийг хувийн харилцаанд оруулж, дараа нь хар тамхины нөлөөнд автуулан бэлгийн үйлдэл хийлгэж, үүнийг бичлэг болгон үлдээдэг байсан хэмээн мэдэгдэж байгаа юм.

Хэрэв дээрх гэмт хэргүүдэд буруутай нь тогтоогдвол Дидди дор хаяж 15 жилийн хорих ял сонсох, эсвэл бүх насаараа хоригдох магадлалтай байна. Түүний эсрэг олон эмэгтэй гэрч болон гарч ирж байгаа нь хэргийг илүү төвөгтэй болгож байгааг шинжээчид онцолж байна.