«Guys» хамтлаг 28 жилийнхээ ойн хүрээнд «Сургууль минь Баяртай» нэртэй анхны албан ёсны задгай талбайн тоглолтоо 5-р сарын 31-нд «SocialPay Park»-д хийхээр товлоод байгаа билээ. Гэвч тус хамтлагийн үнэнч фенүүдийн дунд нэгэн том хүлээлт үүсээд байна. Тэр нь хамтлагийн нэрийн хуудас болсон М.Мягмар буюу Мийгаагийн оролцоо.
Өдгөө гэр бүлтэйгээ Канад улсад ажиллаж амьдарч буй Мийгааг хамтлагийнхан нь төрсөн өдрөөр нь мэндчилгээ дэвшүүлж, нэгэн сонирхолтой шивнээ илгээжээ: «Алаг үрс амьдралын ханьтайгаа алтан нарны ивээлд энх тунх жаргаж яваарай найз минь… Жич: Шивнээ байнаа… Аль болох л хурдан ирээ хө.»
Энэ үгсийг уншсан фенүүдийн дунд Мийгаа тун удахгүй нутагтаа ирж, хамтлагийнхантайгаа хамт тайзнаа гарч магадгүй гэсэн хүлээлт улам бүр нэмэгдэж байна. Үнэндээ «Guys» хамтлагийн энэ тоглолт нь зөвхөн тэдний 28 жилийн ойн баяр төдийгүй, түүхэн анхны задгай талбайн тоглолт гэдгээрээ онцлог тул Мийгаагийн оролцоо нь энэ үдшийг мартагдашгүй дурсамж болгон үлдээх хүлээлтийг үүсгэж байна.
Фенүүдийн хувьд энэ тоглолт зөвхөн «Guys»-ийн дуу хөгжим төдийгүй, Мийгаагийн эргэн ирэлтийн баярт мөч байх эсэх нь одоогоор албан ёсоор баталгаажаагүй байгаа ч хамтлагийнхных нь илгээсэн шивнээ энэ найдлагыг улам бүр бэхжүүлжээ.
