Сүүлийн долоо хоногт “Coldplay” хамтлагийн тоглолтын үеэр тохиолдсон санамсаргүй үйл явдал жижиг технологийн “Astronomer” компанийг олон нийтэд танигдах шалтгаан болгосон билээ.
Тоглолтын үеэр тус компанийн гүйцэтгэх захирал Энди Байрон болон хүний нөөцийн захирал Кристин Кэбот нарын халуун дотно харилцаа үзэгчдэд зориулагдсан камерын дуранд өртөн, гэр бүлээс гадуур харилцаа олон нийтэд ил болжээ. Улмаар уг дуулианы дараа Байрон болон Кэбот нар компанийн удирдах албан тушаалаасаа огцорсон байна.
Шинэ удирдлагын баг энэ нөхцөл байдлыг эерэг уур амьсгал руу чиглүүлж, компанийн нэр хүндийг өсгөх зорилгоор шинэлэг маркетингийн кампанит ажил эхлүүлжээ. Тэд тус компанийн шинэ нүүр царайгаар жүжигчин Гвинет Пэлтроуг сонгож, түүнд зориулсан сурталчилгааны бичлэг бүтээсэн байна.
Уг видео сурталчилгаанд Пэлтроу өөрийгөө “Astronomer” компанийн 300 гаруй ажилтныг түр төлөөлж буй хүн хэмээн танилцуулж, компанийн гол зорилго, үйл ажиллагааны чиглэлийн талаар хүмүүсийн түгээмэл тавьдаг асуултад хариулжээ. Сурталчилгааны төгсгөлд тэрээр “Astronomer компанийг сонирхсон та бүхэнд баярлалаа” хэмээн хэлснээр бичлэг өндөрлөсөн байна.
Хэвлэл мэдээллийн анхааралд өртсөн энэхүү дуулианаас үүдэлтэй маркетингийн алхам нь “Astronomer” компанийн хувьд шүүмжлэл дагуулсан ч, анхаарал татсан, шинэлэг шийдэл болжээ. Тус сурталчилгаа нь өмнөх удирдлагын хэрэгт анхаарал хандуулахын оронд компанийн үйл ажиллагааг илүү өргөн хүрээнд таниулах зорилготой байв.
