HBO-ийн урт хугацааны төсөл болсон “Harry Potter” цувралын шинэ хувилбарын гол гурван дүрд тоглох жүжигчдийн нэрс албан ёсоор зарлагдлаа. 32,000 гаруй хүүхдээс шалгарсан шинэ үеийн Харри Поттер, Рон Уизли, Хермиона Грэйнжерийн дүрд тус тус Доминик Маклафлин, Аластэр Стаут, Арабелла Стэнтон нар тоглохоор болсон байна.
Жүжигчдийг сонгон шалгаруулалтыг HBO-гийн кастингийн ахлах мэргэжилтэн Люси Беван удирдсан бөгөөд тэдний сонголт олон хүний анхаарлыг татаж, шинэ “Хогвартс”-ын эрин үеийг эхлүүлж байна. Хэдийгээр нэр нь олонд танигдаагүй ч Стэнтон өмнө нь Лондонгийн Вест Эндийн “Matilda”-д тоглож байсан бол Маклафлин BBC-ийн “Gifted” драмд үзэгдэх гэж байгаа юм. Эдгээр хүүхдүүд одоогийн Эмма Уотсон, Даниел Рэдклифф, Руперт Гринт нар шиг дэлхийн хэмжээний алдартай жүжигчин болох замдаа орж байна.
Тэдний гарт одоо 10 жилийн турш үргэлжлэх урлагийн замнал, олон нийтийн хяналт, сошиал медиагийн өндөр анхаарал, зохиолч Ж.К. Роулингийн маргаантай байр суурь гэх мэт сорилт тулгарах болно. Агентуудын хэлж буйгаар гэр бүлүүд аль хэдийн ирээдүйд юу болохыг тооцоолж, сэтгэл зүй болон нийгмийн орчинд хүүхдээ бэлтгэх шаардлагатайг онцолжээ.
Одоо бүх анхаарал үлдсэн гол дүрүүд болох Драко Малфой, Чо Чанг, Седрик Диггори нарын хэн хэн болж сонгогдох дээр төвлөрч байна. Мөн хэд хэдэн томоохон насанд хүрэгчдийн дүрийн сонгон шалгаруулалт үргэлжилж байгаа ба зураг авалт энэ зун эхлэх төлөвтэй байна. “Хогвартс”-ын шинэ хичээлийн жил улам ойртлоо.
