Нүүдэлчдийн өв соёл ба орчин үеийн урлагийн уулзвар
Монголын хээ угалз судлаач, уран бүтээлч П.Содгэрэлийн анхны бие даасан үзэсгэлэн “Самсара” Лхам галерейн танхимд дэлгэгдлээ. Энэхүү үзэсгэлэн нь түүний олон жилийн судалгааны үр дүн, нүүдэлчдийн өв соёлыг орчин үеийн урлагийн хэлээр хөрвүүлсэн өвөрмөц бүтээлүүдийг багтааж байна.
“Самсара” үзэсгэлэнгийн гол онцлог нь хээ угалзын бэлгэдэл, утга санааг шинэчлэн тайлбарлаж, тэдгээрийг уран сайхны орон зайд дахин амилуулах явдал юм. П.Содгэрэл нь Чинхуа их сургуулийн доктор бөгөөд хээ угалз судлалаар мэргэшсэн, Монголын соёлын өвийг дэлхийн урлагийн тавцанд сурталчлагч судлаач, зураач юм.
Буга чулуун хээ ба “Самсара”-гийн уран бүтээлийн үзэл санаа
П.Содгэрэл нь 3500 жилийн настай бугын чулуун хөшөөний дүрслэл, сүнслэг утга бэлгэдлийг олон жил судалсан бөгөөд эдгээрийн геометр, хэмнэл, утга санааг орчин үеийн уран бүтээлд шингээжээ. “Самсара” үзэсгэлэнд түүний бүтээлүүд хүн ба байгаль, цаг хугацаа ба оршихуй, өв ба орчин үеийн уялдаа гэсэн философийн санааг илэрхийлдэг.
Тэрээр хээ угалзыг зөвхөн гоёл чимэглэл бус, соёлын дурсамж, сэтгэлгээний хэл, оршихуйн мөчлөгийн илэрхийлэл гэж үздэг.
Өв соёлыг урлагаар дамжуулан шинэчлэл хийх оролдлого
“Самсара” үзэсгэлэн бол өв соёлыг судлан хадгалахын зэрэгцээ орчин үеийн урлагт хөрвүүлэх бүтээлч туршилт юм. Түүний бүтээлүүд үзэгчдэд өвөг дээдсийн залгамж холбоо, амьдралын тасралтгүй урсгал, байгальтай нэгдэл зэрэг сэдвийг тунгаах урам өгч, урлагийн мөн чанар ба уламжлалын тухай дахин эргэцүүлэхэд хүргэдэг.
Уран бүтээлчийн яриа — “Artist Talk”
Үзэсгэлэнтэй холбоотойгоор 2025 оны аравдугаар сарын 20-ны Даваа гарагт 18:30 цагт Лхам галерейн үзэсгэлэнгийн танхимд уран бүтээлчийн “Artist Talk” болох юм. Энэ үеэр П.Содгэрэл өөрийн уран бүтээлийн замнал, буган хээний судалгаа, мөн “Самсара” үзэсгэлэнгийн уран сайхны үзэл санааны талаар илтгэл тавьж, үзэгчидтэй халуун дотно ярилцлага өрнүүлэхээр төлөвлөжээ.
Энэхүү арга хэмжээ олон нийтэд нээлттэй, үнэ төлбөргүй бөгөөд урлагт сонирхолтой хэн бүхэнд хүрэлцэн очих боломжтой.
“Самсара” үзэсгэлэн 2025 оны арваннэгдүгээр сарын 10-ныг хүртэл үргэлжилнэ.
