“Хунт нуур” балет 50 жилийн ойгоо хоёр театрын тайзнаа гурван өдөр дараалан тэмдэглэнэ

Монголын Дуурь Бүжгийн Эрдмийн Театр (УДБЭТ) 2025 оны төлөвлөгөөний хүрээнд сонгодог балетын оргил бүтээл болох П.И.Чайковскийгийн “Хунт нуур” балетын 50 жилийн ойг тэмдэглэхээр бэлтгэж байна. Тус бүтээл анх 1975 оны зургадугаар сарын 28-нд УДБЭТ-ын тайзнаа тавигдсан бөгөөд энэ жил 203 дахь удаагаа тоглогдох гэж байна.

“Хунт нуур” балетын тоглолт:

• 2025.06.26, 27 – ОХУ-ын Буриадын театрын уран бүтээлчдийн оролцоотой тавилтаар
• 2025.06.28 (17:00 цаг) – УДБЭТ-ын өөрийн тавилтаар 203 дахь удаагаа

Уран бүтээлчид:

Буриадын театрын ерөнхий балетмейстр, ОХУ-ын гавьяат жүжигчин Дамбаев Баярто удирдан оролцож байна. Мөн Ямада Харука, Ванданов Эльдар, Богданова Александра, Болтанов Алдар нарын 60 уран бүтээлч ирж оролцоно.

П.И.Чайковский уг балетыг анх үеэл Давидийн хүүхдүүдэд зориулж “Озера лебедей” нэртэйгээр зохиосон боловч, 1877 онд Их театрт албан ёсоор анхны тоглолтоо хийсэн байдаг. Энэхүү бүтээл нь дэлхий дахинд сонгодог балетын оргил гэж тооцогддог бөгөөд бүжигчдээс академик арга барилыг өндөр түвшинд шаардаж, жинхэнэ балетчин болох шалгуур болдог.

Монголын тайзнаа 50 жилийн түүх:

1975 онд балетмейстер, Ардын жүжигчин Б.Жамьяндагва, удирдаач Ж.Чулуун, тайзны ерөнхий зураач Ч.Гунгаасүх нарын хамтын бүтээлээр “Хунт нуур” балет Монголын тайзнаа анх амилжээ. Анхны тоглолтын гол дүрүүдэд:

• Одетта/Одиллия – МУАЖ Ю.Оюун
• Зигфрид – МУГЖ Э.Оюунбат
• Ротбарт – МУГЖ Н.Баатар
• Алиа салбадай – АЖ Х.Ганбаатар нар тоглосон байна.

Хөгжмийн гол онцлог:

Балетыг симфони оркесторгүйгээр төсөөлөхийн аргагүй. Хөгжим нь далай, хунгуудын уян хөдөлгөөн, хайр дурлалын утга агуулгыг хөгжимчилсөн хамгийн төгс хэлбэр юм. Тус балетын анхны гоцлол хөгжимчдөд:

• Хийл: МУГЖ Л.Аюуш
• Виолончель: Ж.Жиняаз
• Труба: Ч.Наранхүү
• Арф: Бү.Чинбат
• Гобой: Н.Даваадорж
• Кларнет: Г.Гомбосүрэн
• Флейт: Н.Даржаа
• Фагот: Л.Мягмарсүрэн
• Волторн: МУГЖ Б.Батчулуун нар багтаж байв.

Тус балет Монголын сонгодог урлагийн салбарт өндөр байр суурь эзэлдэг бөгөөд “Хунт нуур”-ыг тоглох өдөр бүрийг үзэгчид баяртайгаар хүлээдэг нь тус бүтээлийн урлагийн үнэлэмжийн илэрхийлэл юм.