Хувцас загварын гэрэл зургийн ертөнцөд нэрээ тод бичүүлсэн Италийн алдарт зурагчин Энрико Лабриола Монгол Улсад анх удаа бие даасан үзэсгэлэнгээ дэлгэхээр болжээ. “Агшин” нэртэй уг үзэсгэлэн нь ирэх долоодугаар сарын 2-ноос 8-ны өдрүүдэд Лхам галерейд нээлттэйгээр зохион байгуулагдана.
Энрико Лабриола Милан хотод уран бүтээлчийн гараагаа эхлүүлж, дэлхийн хэмжээний загварын сэтгүүлүүдэд бүтээлээ нийтлүүлсэн, нэр хүндтэй гэрэл зурагчин юм. Түүний ажил бүтээлүүд Vogue Italia, Vanity Fair, Style Magazine, Maxim зэрэг олон улсын сэтгүүлүүдийн нүүрийг чимж, Донателла Версаче, Амбра Анжолини зэрэг алдартнуудыг дурандаа буулгаж байжээ. Загварын ертөнцийн орон зайг тодоор илэрхийлж чаддаг, гэрэл, сүүдрийн зохицол, уур амьсгалыг онцгой мэдэрч чаддаг авьяас нь түүнийг дэлхийн хамгийн шилдэг загварын гэрэл зурагчдын нэг болгоход хүргэсэн.
Түүний бүтээлүүд зөвхөн хувцас танилцуулах зориулалттай сурталчилгааны зураг төдий бус, урам зориг өгч, гоо зүйн мэдрэмж төрүүлдэг, уран сайхны үнэт бүтээлүүд юм. Хувцас, загвар өмсөгч, орчин, гэрэл, өнцөг зэрэг олон элемент нэг цул болж зураг бүрийг сэтгэл хөдөлгөм түүх мэтээр хүүрнэдэг нь түүний онцлог.
Энэ удаагийн “Агшин” үзэсгэлэн нь түүний дэлхий дахинаар аялж, соёлын ялгааг гэрэл зурагт шингээсэн, өөрийн дурангаар олж харсан өвөрмөц мөчүүдийг монгол үзэгчдэд хүргэх зорилготой. Үзэсгэлэн нь хэн бүхэнд нээлттэй бөгөөд гэрэл зураг, тэр дундаа хувцас загварын урлагт дуртай хүмүүст онцгой урам зориг, шинэ мэдрэмж өгөх нь дамжиггүй.
Мөн “Fashion Development Foundation”-ийн санаачилгаар долдугаар сарын 8-нд “Secrets of Creative Communication” нэртэй мэргэжлийн сургалт зохион байгуулагдаж, монгол гэрэл зурагчид, уран бүтээлчидтэй туршлага солилцох боломж бүрдэх юм. Энрико Лабриолагийн Монголд байх хугацаанд брэнд хөгжүүлэлт, хөрөг зураг, загварын зураг авалт зэрэг бүтээлч хамтын ажиллагаанд оролцох боломж нээлттэй бөгөөд энэ нь монгол уран бүтээлчдэд дэлхийн жишигт хүрэх нэг алхам болох нь гарцаагүй.
