БНХАУ-д ижил хүйстний тухай сэдэв олон нийтэд ил яригдах нь хориотой хэвээр байгаа энэ үед тус улсын хэд хэдэн залуу эмэгтэй зохиолч ийм агуулгатай бүтээл туурвиж, улмаар эрх баригчдын анхааралд өртжээ. Үүний үр дүнд тэд болон зарим уншигчийг баривчилж, холбогдох цахим хаяг, нийтлэлүүдийг устгасан байна. Цаашлаад энэ талаар мэдээлсэн томоохон мэдээллийн сайтын нийтлэлийг ч устгажээ.
Баривчлагдсан зохиолчдын нэг нь мэдэгдэлдээ:
“Би энэ талаар ярих ёсгүй. Тэнд намайг эмнэлгийн үзлэгт оруулахын тулд олон хүний өмнө нүцгэлсэн. Хантааз өмсгөж зургийг минь авсан. Намайг дорд үзэж байв. Би маш их айсан. Үүнийг хэзээ ч мартахгүй. Би шударгаар орлого олсон ч тэд намайг хууль бусаар мөнгө олсон тул бүгдийг нь буцааж төлөх ёстой гэсэн” хэмээн хэлжээ.
“Pingping Anan Yongfu” нэртэй Weibo хэрэглэгчийн нэр дээрээс ижил хүйстний бэлгийн харилцааг харуулсан зургууд нийт найман хаягаар түгээгдсэн болохыг тогтоожээ.
Энэ хэргийн дараа олон өмгөөлөгч зохиолчдод үнэ төлбөргүй туслах санал гаргасан байна. Зарим эх сурвалжийн мэдээлснээр, 2025 оны хоёрдугаар сараас хойш 30 орчим зохиолч баривчлагдсан бөгөөд тэдний олонх нь залуу эмэгтэйчүүд аж. Зарим нь батлан даалтаар суллагдсан ч, зарим нь шүүх хурлаа хүлээж байгаа гэнэ. Мөн тэдний бүтээлийг хэвлэсэн, цахим хэлбэрээр түгээсэн хүмүүсийг ч байцаалтанд дууджээ.
Эдгээр зохиолуудыг Тайваньд төвтэй Haitang Literature City хэвлэлийн газар нийтэлсэн бөгөөд тус байгууллага нь ижил хүйстэй эрэгтэйчүүдийн тухай уран зөгнөлт зохиолуудаараа Хятадын залуу эмэгтэй уншигчдын дунд алдартай болжээ.
Гэвч Хятадын төрийн зүгээс зохиолчдыг “ичгүүртэй, булай агуулга” түгээсэн хэмээн буруутгаж, холбогдох хуулийн заалтаар 10-аас дээш жилийн хорих ял оноох боломжтой гэж анхааруулсан байна. Хуульд зааснаар, ижил хүйстнүүд болон бусармаг бэлгийн үйлдлийг дүрслэх, сурталчлахыг хориглодог аж.
Хятадад зөвхөн эсрэг хүйстэн хоорондын харилцааг л уран бүтээлд дүрслэхийг зөвшөөрдөг бөгөөд Нобелийн шагналт зохиолч Мо Яны бүтээлүүд ч энэ хүрээнээс хэтэрдэггүй, улмаар төрийн цензурт бараг өртдөггүй байна.
Зохиолчдыг баривчилсан нь олон нийтийн цахим платформуудад хурц хэлэлцүүлэг өрнүүлж, хуулийн хэт хатуу чанарт шүүмжлэл хөвөрсөн юм. Жишээ нь нэгэн Weibo хэрэглэгч “Секс ичих ёстой зүйл үү?” хэмээж, хуулийн өөрчлөлтийг шаардан уриалга гаргажээ. Харин зарим хуульч 5000 удаа “ичгүүртэй” контент түгээх тохиолдолд эрүүгийн хариуцлага хүлээлгэдэг одоогийн босгыг хөндөж болохгүй гэж мэдэгдсэн байна. Үүнтэй зэрэгцэн эрх баригчид дээрх төрлийн агуулгатай бүх мэдээллийг цахимаас нэн даруй устгаж эхэлжээ.
«Pingping Anan Yongfu» нэртэй хэрэглэгч хаягаа хаахаасаа өмнө нийтлэл хуваалцсаныхаа төлөө уучлал гуйж, дэмжигчдэдээ талархал илэрхийлсэн байна. Тэрээр: “Би гэрийнхээ сайн охин нь байв. Гэвч тэдэндээ ичгүүрээс өөр зүйл өгч чадсангүй. Тэд дахин толгой өөд алхаж чадахгүй боллоо” хэмээн бичжээ.
Хэрэгт холбогдсон бусад зохиолчид ВВС-д ярилцлага өгөхөөс татгалзсан бөгөөд тэдний зарим нь өөрсдийн бичсэн зүйлс өөрийнх нь эсрэг ашиглагдана гэдгийг анзаараагүй байсан хэмээн мэдэгдсэн байна. Түүнчлэн зарим нь 20 настайгаасаа амьдрал, ирээдүйгээ эрсдэлд оруулсандаа харамсаж буйгаа илэрхийлжээ. Харин Ланжоу хотын цагдаагийн газар уг хэрэгтэй холбоотой мэдээлэл өгөхөөс татгалзсан байна.
