ДДэш болон СОБЫТ студийн хамтран бүтээсэн монгол уран сайхны кино “Хар өглөө” 5-р сарын 20-ноос эхлэн Univision, DDish, LookTV платформуудаар албан ёсоор цацагдаж эхэлсэн бөгөөд ердөө нэг долоо хоногийн дотор үзэгчдийн дунд өндөр хандалт, сонирхлыг бий болгоод байна.
Киноны нэр нь үйл явдлын сэтгэлзүйн оргил хэсгээс сэдэвлэн сонгогджээ. Анх амьдрал жирийн байдлаар эхэлж буй мэт харагдах боловч гэнэт бүх зүйл орвонгоороо эргэж, хар дарсан зүүд шиг өглөөг угтдаг мөчөөр түүх эхэлдэг. Энэ бол “Хар өглөө”-гийн эхлэл. Гэмт хэргийн сэжүүрийг тайлахын тулд үзэгч хоёр цагийн турш айдас, эргэлзээ, таавар, сэтгэл хөдлөлийн дунд хөтлөгдөх бөгөөд “хэн буруутан бэ?” гэсэн асуултад хариу хайх аялалд орно. Кино нь сэтгэлзүй, үйл явдал, нууц, айдас зэрэг олон давхар сэдвийг уран нарийн хослуулсан бүтээл болсон.
Киноны найруулагчаар Е.Даваасүрэн ажилласан бөгөөд гол дүрүүдэд Б.Батмэнд, Э.Пүрэвжаргал, Е.Даваасүрэн, Б.Пүрэвдорж, Т.Лхагвадулам, Э.Бадамбаш нар тогложээ. Жүжигчдийн гүйцэтгэл, найруулгын хэв маяг, зохиолын өрнөл зэрэг нь монгол кино урлагт шинэ өнгө төрх авчирч, үзэгчдийг бодит мэт мэдрэмжид автуулахуйц түвшинд хүрсэн байна.
Сэтгэлзүйн гэмт хэргийн жанрт дурлагч үзэгч танд зориулагдсан “Хар өглөө” кино одоо Univision, DDish, LookTV-ээр хүрч байна.
