Ирээдүйгээс ирсэн Доремон: Хүүхэд насны дурсамж сэргээсэн домогт дүр

Хүүхэд насны дурсамжийг сэдрээдэг, мартагдашгүй дүрүүдийн нэг бол яах аргагүй Доремон. Японы алдарт манга зураач Фужико Фужио-гийн бүтээл болох энэ цэнхэр робот муур нь зөвхөн Япон гэлтгүй дэлхий даяар сая сая хүүхдүүдийн хайртай аниме дүр болон хүндлэгдсээр ирсэн.

Доремон бол XXII зуунаас ирсэн, ирээдүйн технологитой робот муур бөгөөд ухаан муутай, санаачилгагүй хүү Нобитад туслахаар түүний амьдралд ирдэг. Түүний хамгийн алдартай онцлог бол 4D халаас – хаанаас ч гарч ирэх төхөөрөмжүүд, цаг хугацааны машин, хаашаа ч хүргэх хаалга, нисдэг сэнс зэрэг гайхалтай зүйлийг түүнээс гаргаж ирдэг. Гэвч анх Доремон шар өнгөтэй байсан бөгөөд хулганад чихээ хазуулж уйлсны улмаас өнгөө алдсан, улмаар бидний танил цэнхэр өнгөтэй, дугуй толгойтой дүр нь бүрэлдсэн гэж үздэг.

Доремон анх 1969 онд манга хэлбэрээр уншигчидтай уулзсан бөгөөд өдгөө 45 боть цувралтай болсон. Анхны аниме цуврал нь 1979–2005 онд анх нэвтрүүлэгдэж, 2005 оноос дүрслэл болон дуу оруулалтад шинэчлэл хийгдсэн. Анхны бүрэн хэмжээний кино болох “Doraemon: Nobita’s Dinosaur” нь 1980 онд үзэгчдийн хүртээл болсон бол хамгийн сүүлд 2023 онд “Doraemon: Nobita’s Sky Utopia” нэртэй кино гарсан юм. Нийт 40 орчим бүрэн хэмжээний кино бүтээгдсэн бөгөөд эдгээр нь дэлхийн 30 гаруй хэл дээр орчуулагджээ.

Сонирхолтой нь, Пакистан улс энэ анимег хүүхдийн залхууралд нөлөөлнө хэмээн үзэж, хориг тавьж байсан удаатай.

Доремонтой холбоотой олон таамаг, яриа бий. Тэдгээрийн дундаас хамгийн алдартай нь — тэр бол үнэн хэрэгтээ найзгүй, хүнд өвчтэй хүүгийн төсөөллийн дүр байсан гэх сэтгэл хөдлөм онол юм. Энэхүү хүүгийн дурсгалд зориулж анимег бүтээсэн гэх энэ таамаг нь хэзээ ч албан ёсоор батлагдаагүй ч, хэн ч үгүйсгээгүй тул өнөөдрийг хүртэл хүмүүсийн сонирхлыг татсан сэдэв болсоор байна.

Япон аниме нь 2010-аад оноос хойш дэлхий даяар хүчээ авч, орчин цагийн соёлын салшгүй хэсэг болон хөгжсөөр буй энэ үед, Доремон шиг дүрүүд бидний уран сэтгэмж, хүсэл мөрөөдөл, нөхөрлөлийн үнэ цэнийг хүүхэд наснаас л суулгаж өгсөн билээ.