Америкийн хөгжмийн хамгийн нэр хүндтэй хэвлэлүүдийн нэг болох Billboard сэтгүүл өчигдөр өөрийн албан ёсны вэбсайт болон сошиал хуудсуудаараа 5-р сарын дугаартаа BTS хамтлагийн гишүүн J-Hope-г нүүр зурагт онцолсон тухай мэдээллээ.
Түүхэн амжилт
Ингэснээр J-Hope нь Billboard сэтгүүлийн нүүрэнд гарсан анхны Солонгос эрэгтэй соло уран бүтээлч болж түүхэнд бичигдлээ. Дэлхийн хөгжмийн ертөнцөд жин дарах нөлөө бүхий энэ сэтгүүлийн нүүрэнд багтана гэдэг нь тухайн уран бүтээлч олон улсад хүлээн зөвшөөрөгдөж, өндөр түвшинд хүрсэний тод илрэл юм.
Өмнө нь BTS хамтлаг 2018 оны тусгай дугаар, мөн 2021 оны 8-р сарын дугаарт бүх гишүүдээрээ хамт орсон байдаг.
Billboard-ийн үнэлгээ
Billboard сэтгүүл J-Hope-ийг дараах байдлаар тодорхойлжээ:
“Тайзны гайхалтай дүр төрх, олон жилийн турш олны анхаарлыг татсан дуучин. Тэр BTS-ийг дэлхийн хэмжээнд од болоход чухал үүрэг гүйцэтгэсэн хүн.”
Уран бүтээлчийн сэтгэлийн үг
Зураг авалттай хамт нийтлэгдсэн ярилцлагад J-Hope дараах сэтгэгдлийг хуваалцжээ:
“Би багадаа биширдэг байсан уран бүтээлчдээс урам зориг авдаг байсан шигээ, одоо миний хөгжим хэн нэгэнд эерэг энерги өгөөсэй гэж хүсдэг. Би хаана ч очсон гэрэл гэгээ, урам зориг өгдөг уран бүтээлч болохыг зорьж байна.”
