Улаанбаатар, 2025 оны 5-р сарын 21 — Монгол эмэгтэйчүүдийн авьяас чадвар, тэмүүллийг дэлхийд таниулж яваа загвар өмсөгч Б.Номин Канадын нэр хүндтэй загвар, авьяасын тэмцээнд тэргүүн байр эзэлж, эх орныхоо нэрийг өндөрт өргөсөнд нь Монгол Улсын Элчин сайд талархал илэрхийллээ.
Олон улсын тэмцээнд тэргүүн байр эзэлжээ
Б.Номин Канадын “Commercial Print Model” ангилалд амжилттай оролцож, тэргүүн байр эзлээд зогсохгүй, жүжигчний авьяасыг үнэлсэн Пол Салливаны нэрэмжит шагналыг хүртжээ. Тэрбээр уг тэмцээнд оролцсон анхны монгол эмэгтэй болж, олон улсад Монголын нэр хүндийг дуурсгасан байна.
Элчин сайдын талархал
Монгол Улсаас Канад улсад суугаа Онц бөгөөд Бүрэн эрхт Элчин сайд Э.Сарантогос Б.Номинг хүлээн авч уулзан, түүний амжилтад баяр хүргэж, “Канадад эх орныхоо нэр төрийг өндөрт өргөж, Монгол соёл, урлагийг сурталчилж яваа тань бахархалтай явдал” хэмээн онцлон, урлагийн замналд нь улам их амжилт хүсэн ерөөжээ.
Урлагийн олон талт авьяас
Загварын ертөнцөд 15 жилийн турш хүчин зүтгэж буй Б.Номин гэрэл зураг, кино, телевизийн 150 гаруй бүтээлд оролцжээ. Тэр дундаа Монгол ахуйг дэлхийд таниулсан “Burn Your Maps” уран сайхны кинонд гол дүр бүтээж, олон улсын үзэгчдээс өндөр үнэлгээ авсан.
- 2016 онд Канадад зохион байгуулсан бодибилдинг, фитнессийн тэмцээнд шагналт V байр эзэлж, биеийн хөгжил, тууштай хөдөлмөрөө харуулж байсан бол
- 2024 оны “Miss Universe Canada” тэмцээнд шилдэг 14 оролцогчийн нэгээр шалгарсан нь түүний авьяас чадвар, олон талт байдлыг дахин нотолсон билээ.
Карьер ба нийгмийн оролцоо
Б.Номин нь Канадын Эрүүл мэндийн яаманд бодлогын шинжээч мэргэжлээр ажиллахын зэрэгцээ загварын тайз, кино урлагийн салбарт амжилттай оролцсоор байгаа бөгөөд ур чадвар, олон талын оролцоогоороо бусдад үлгэр дууриал үзүүлсээр байна.
2 сэтгэгдэлүүд
Монгол залуус дэлхийд нэрээ гаргаж байгаад үнэхээр бахархаж байна
Элчин сайдын зүгээс үнэлж, дэмжиж байгаад талархаж байна. Сайхан мэдээ байлаа