Алдарт найруулагч Квэнтин Тарантиногийн “Kill Bill” болон “Reservoir Dogs” кинонуудаар үзэгчдэд танигдсан Америкийн жүжигчин Майкл Мэдсен 67 насандаа хорвоог орхисон талаар албаны эх сурвалжууд баталлаа.
Мэдсенийг өнгөрсөн Пүрэв гарагийн өглөө Калифорнийн Малибу хот дахь өөрийн гэрт нь нас барсан байдалтай байхад нь олсон тухай Лос-Анжелесын шерифийн албаны ахлагч Кристофер Жауреги мэдээлжээ. Урьдчилсан байдлаар түүнийг гаднын нөлөөгүйгээр таалал төгссөн гэж үзэж байгаа аж. Харин түүний менежер Рон Смит зүрхний шигдээс болсон байж болзошгүй гэж мэдэгдсэн байна.
1980-аад оноос эхэлсэн урлагийн замналынхаа туршид Мэдсен 300 гаруй уран сайхны кинонд дүр бүтээж, бага төсөвтэй ч утга санаа өндөртэй бүтээлүүдээрээ танигдаж байв. Тэрээр “Reservoir Dogs”, “Kill Bill”, “The Hateful Eight” зэрэг Тарантиногийн бүтээлүүдэд тоглосноороо дэлхий дахинд алдартай болж, Холливүүдийн анхаарлын төвд байсаар ирсэн.
Сүүлийн жилүүдэд Мэдсен “Resurrection Road”, “Concesion and Cookbook for Southern Housewives” зэрэг бие даасан кино төслүүд дээр ажиллаж байсныг менежментийн баг нь онцолжээ. Тэд түүнийг “Холливүүдийн хамгийн содон бөгөөд үгүйлэгдэх жүжигчдийн нэг байсан” хэмээн хүндэтгэлтэйгээр дурсан ярьсан байна.
Мэдсен 2020 оны арваннэгдүгээр сард TLC Chinese Theatre кино театрын өмнө гарын хээ үлдээх ёслолд оролцохдоо жүжигчин болох замналаа дурсан:
“Би тухайн үед эргэн тойрноо хараад, нэг л өдөр эдний нэгэн болохсон гэж мөрөөддөг байлаа. Гэхдээ яг яаж гэдгээ мэддэггүй байсан. Би тоосго өрөгч ч болж болох байсан. Архитектор ч байж болох байсан. Хог түүдэг ч хүн болж мэдэх байлаа. Магадгүй хэн ч биш ч байх байсан байх. Гэхдээ жүжигчин болсон нь миний амьдралын хамгийн том аз юм гэж боддог.”
Түүний хосгүй авьяас, гүн гүнзгий дүрүүд бүтээдэг ур чадвар нь дэлхийн кино урлагт тод мөр үлдээсэн бөгөөд тэрээр олон үзэгчдийн зүрх сэтгэлд үүрд хоногших болно.
