Өмнөд Солонгосын дуучин, «Running Man» шоугаар дэлхий даяар алдаршсан Ким Чен Кук наймдугаар сарын 18-нд өөрийн фэн кафегоор дамжуулан гэрлэх гэж буйгаа албан ёсоор мэдэгдэв.
Тэрбээр бичсэн захидалдаа:
“Би гэрлэж байна. Ийм зүйл бичих өдөр ирнэ гэж бодож байсан ч яг энэ мөчид бичиж сууна гэхээр сандарч, догдолж байна. Энэ жил миний уран бүтээлийн 30 жилийн ой тохиож байна. Цомог гаргахын оронд сэтгэлийн ханиа оллоо. Бидэнд баяр хүргэж, сайн сайхныг хүсээрэй” гэжээ.
Хуримын товч мэдээлэл
- Хуримыг ойрын гэр бүл, найз нөхдийн хүрээнд даруухнаар хийхээр төлөвлөжээ.
- Ким Чен Кук карьерынх нь туршид дэмжсэн шүтэн бишрэгчдэд талархал илэрхийлсэн байна.
Сүйт бүсгүйн тухай цуу яриа
Захидлын дараа цахим орчинд сүйт бүсгүйнх нь талаарх таамаг эрчимтэй тархав. Хамгийн их яригдаж буй хувилбар бол Лос Анжелест байрлах гоо сайхны компанийн 38 настай гүйцэтгэх захирал бүсгүй гэнэ.
Гэсэн ч Кимийн агентлаг албан ёсоор:
“Тэр өөрийн бичсэн захидлаас бусад зүйлсийг бид баталж чадахгүй” хэмээн мэдэгдэв.
2018 оноос хойш Ким АНУ-д байнга очдог болсон тухай, мөн Лос Анжелест олон жил найзалсан бүсгүйтэй холбоотой гэх яриа тарж байсан нь энэ таамгийг улам хүчирхэгжүүлжээ. Жүжигчин Ча Тэ Хёны сэтгэгдэл ч түүнийг АНУ-д хэн нэгэнтэй дотно харилцаатай гэсэн сэжгийг нэмэгдүүлсэн байна.
Хятадад шуугиан тарив
Ким Чен Кук “Running Man”-ы оролцогчийн хувиар Хятадад асар их нэр хүндтэй тул хуримын мэдээ Weibo-ийн хайлтын жагсаалтад 1-р байранд бичигдэв. Sohu, Sina Entertainment, China.com зэрэг гол сайтууд энэ мэдээллийг онцлон нийтэлжээ.
Мөн тэрээр SBS телевизийн ирэх сарын сүүлээр цацагдах “Running Man” нэвтрүүлгийн бичлэгийн үеэр хуримынхаа тухай товч дурдсан байна.
