Дэлхийн хөлбөмбөгийн ертөнцийн домогт тамирчин Криштиану Роналдугийн нэрэмжит музей Хонконгт албан ёсоор нээлтээ хийлээ. “CR7 LIFE” нэртэй уг музейг үзэхээр хөлбөмбөгийн олон мянган шүтэн бишрэгчид цугларч, хэдэн цагийн турш дараалалд зогссон байна. Хонконгод музей нээгдсэн нь хүүхэд, залууст хөлбөмбөг болон спортын эерэг нөлөөг түгээх чухал үйл явдал хэмээн зочид онцоллоо.
Энэхүү музейд Роналдугийн хүртсэн цом, медалиуд, өмсөж байсан хувцас, дурсамжтай гэрэл зургууд зэрэг олон төрлийн эд зүйлс дэлгэгдэж байна. CR7 LIFE музей нь Португал дахь анхны салбараасаа гадна өөр улсад байгуулагдаж буй анхны салбар болсноороо онцлог.
Мөн музейн үзүүлэн дунд Роналдугийн бодит хэмжээтэй хөшөөнүүдийг байрлуулжээ. Түүний Манчестер Юнайтед, Реал Мадрид зэрэг алдартай багуудад тоглож байх үеийн дүр төрхийг харуулсан хувцастай хөшөөнүүдээс гадна Саудын Арабын уламжлалт хувцастай дүрс ч байршсан байна.
Музейг үзэхээр ирсэн зочдын дунд 14 настай хүү Алвин Лай байсан бөгөөд тэр хамгийн эхэнд зогсож “Роналду бол миний шүтээн, тэр бүхнээс онцгой супер од” хэмээн сэтгэгдлээ хуваалцжээ.
Өнгөрсөн сард Роналду Саудын Арабын Аль Насср клубтай хоёр жилийн шинэ гэрээ байгуулсан. Түүний баг ирэх сард улирлын өмнөх тоглолтоо хийхээр Хонконгт ирэх бөгөөд энэ үеэр Роналду өөрийн биеэр ирж, музейн зочидтой уулзана гэж хэвлэлийн төлөөлөгч нь мэдээлсэн байна.
Музей нь нийт 1,110 м.кв талбайд байрлаж байгаа бөгөөд Хонконгт нэг жилийн турш нээлттэй ажилласны дараа Хятадын эх газарт шилжин нээгдэхээр төлөвлөжээ. Зохион байгуулагчдын зүгээс энэхүү музей нь олон хүний мөрөөдлийг өдөөж, урам зориг өгөх төв болно гэдэгт итгэлтэй байгаагаа илэрхийлсэн байна.
