Алдарт уран зураач Марк Шагалын уран бүтээлүүд 2025 оны тавдугаар сард болсон “Sotheby’s” болон “Christie’s” дуудлага худалдаанд түүхэндээ хамгийн өндөр үнэд хүрлээ. Түүний гурван бүтээл нийт 10 сая орчим долларын ханшаар арилжигдсан бөгөөд энэ нь зөвхөн уран зургийн үнэлэмжээс гадна уран бүтээлчийн нэр хүнд, бүтээл туурвисан цаг үе, уран сайхны агуулгын онцлог зэрэг олон хүчин зүйлтэй шууд холбоотой юм.
1. 98 насандаа зурсан “Цирк” бүтээл — 3.4 сая доллар
Марк Шагал 1983 онд, 98 насандаа зурсан “Circus” буюу “Цирк” нэртэй зургаа амар амгалан орших Францын Азурын эргийн Сент-Пол-де-Ванс тосгонд бүтээсэн. Дуудлага худалдааны мэргэжилтнүүд эхэндээ энэ бүтээлийг 1.8–2.5 сая долларт хүрнэ гэж таамаглаж байсан ч бодитоор 3.4 сая доллараар арилжигдсан нь анхаарал татав. Шагалын амьдралын сүүлчийн жилүүдийн бүтээл гэдэг утгаараа түүхэн үнэ цэнэ, уран бүтээлийн ховор байдал нь үнийг өсгөхөд нөлөөлсөн.
2. “Autour de Vence” — 6 сая доллар
1955–1957 оны хооронд зурсан “Autour de Vence” хэмээх уран зураг дуудлага худалдаанд 5.9 сая доллараар борлуулагдсан нь тухайн бүтээлийг 3–5 сая долларын хооронд үнэлсэн анхны тооцооллоос давж гарсан. Энэ бүтээл нь Шагалын уран бүтээлийн оргил үеийг илтгэж, түүний онцгой сэтгэл хөдлөл, мөрөөдөл, дурсамжийг холилдуулсан уран дүрслэлүүдийг шингээсэн байдлаараа үнэт зүйлийг агуулдаг.
3. “La Mer (Тэнгис)” — 945,000 доллар
1945 онд зурсан “La Mer” зураг Нью-Йорк хотноо болсон “Christie’s”-ийн дуудлага худалдаанд 945,000 долларт хүрчээ. Энэхүү бүтээлийг анх 906,000 доллараар үнэлж байсан ч 2025 онд дахин дуудлага худалдаанд ороход үнэ нь 39,000 доллароор нэмэгдсэн байна. Уг бүтээл нь тосон будгаар бүтсэн, харьцангуй жижиг хэмжээтэй ч урлагийн үнэ цэнэ, түүхэн байр суурь, бүтээл туурвисан он цагийн агуулгаараа үнэлэгдэв.
4. “Тосгоны уул” — үнэ тодорхойгүй
1969 онд зурсан “Le Baou de Saint-Jeannet” буюу “Сен-Жанет тосгоны хадан уул” нэртэй зураг мөн энэ оны дуудлага худалдаанд оролцсон ч үнэ нь одоогоор тодорхойгүй байна. Гэсэн ч урьд нь 1.3 сая доллароор арилжигдаж байсан уг зураг энэ удаа 1.2–1.8 саяын үнэлгээтэй байсан ч доогуур үнэд хүрсэн бол хохиролтой дуудлага худалдаа болсон гэж үзэх үндэстэй.
Энэхүү зурагт Шагал өөрийн олон жил амьдарсан Сен-Жанет тосгоны байгаль, уур амьсгал, амьдралын хэв маягийг уран дүрслэлээр мөнхөлжээ. Тэрхүү уулыг Шагал дотоод сэтгэлтэйгээ адилтгаж, бэлгэдэл болгон олон бүтээлдээ давтан зурсан байдаг.
2 сэтгэгдэлүүд
Марк Шагалын бүтээл ийм өндөр үнэд хүрсэнд гайхаж байна, урлагийн үнэ цэнэ гэж энэ байх даа
Хамгийн гол нь түүх, соёл, уран сэтгэмжтэй гүн холбоотой зураг шүү дээ