Загварын ертөнцийн оргил үйл явдал энэ тавдугаар сарын эхний Даваа гарагт болно
Тавдугаар сарын эхний Даваа гарагт Нью-Йорк хотод уламжлалт Met Gala — жилийн хамгийн чухал, загварын ертөнцөд зориулсан хандивын үдэшлэг зохион байгуулагдана. Энэ жилийн сэдэв: Superfine: Хар стилийг илэрхийлэх төгс загвар.
Met Gala гэж юу вэ?
Met Gala бол жил бүр зохиогддог, дэлхий даяар сая сая хүний анхаарлыг татдаг үйл явдал юм. Зочид онцгой, урлагийн бүтээл мэт өндөр зэрэглэлийн хувцастай ирдэг уламжлалтай.
Met Gala-ийн үүсэл ба түүх
Met Gala-г 1948 онд загварын хэвлэл мэдээллийн ажилтан Элеонора Ламберт санаачлан, Метрополитен музейн Хувцасны хүрээлэнд зориулсан хандивын үйл ажиллагаа болгон анх зохион байгуулжээ. Эхний удаагийн оройн зоогийн тасалбар ердөө 50 доллар байсан бөгөөд Нью-Йоркийн дээд зиндааны хүмүүс оролцдог жирийн хандивын арга хэмжээ байв. Анх музейн байранд биш, харин Төв цэцэрлэгт хүрээлэн, Waldorf Astoria зочид буудал, Rainbow Room зэрэг газруудад болж байсан юм.
1960 онд анх удаа Метрополитен музейн Их танхимд болж, Египетийн хэв маягаар чимэглэсэн орчинд явагдсан. 1972 онд Диана Вриланд Хувцасны хүрээлэнгийн тусгай зөвлөхөөр ажиллаж эхэлснээр Met Gala улам зоригтой, өвөрмөц хэв шинжтэй болж, энгийн хандивын оройн зоог биш, загварын ертөнцийн хамгийн чухал үйл явдал болон хувирсан.
Сэдэвт үдэшлэгийн эхлэл
1973 оноос Met Gala сэдэвтэй болсон. Эхнийх нь Испанийн алдарт дизайнер Кристобаль Баленсиагад зориулсан “Баленсиагийн ертөнц” нэртэй байв. Вриландын санаачилгаар зөвхөн нийгмийн элитүүд биш, Холливудын одууд оролцож эхэлсэн бөгөөд Шер, Дайана Росс, Мик Жаггер нар хамгийн анхны алдарт оролцогчид байв.
Анна Винтурын шинэ үе
1989 онд Вриланд таалал төгсөж, 1995 онд Vogue сэтгүүлийн ерөнхий редактор Анна Винтур Met Gala-г удирдаж эхэлсэн. Тэрээр:
- Зочдын тоог 650-700 болгож хязгаарласан.
- Үдэшлэгийг 12-р сараас 5-р сарын эхний Даваа гараг руу шилжүүлсэн.
- Тасалбарын үнийг өсгөсөн: 1990-ээд оны эцсээр 2000 доллар, 2010 он гэхэд 25,000 долларт хүрсэн. 10 хүний ширээ 250,000 доллар болсон.
Зохион байгуулагч дизайнерууд ширээ худалдан авч, алдартнуудыг урьж, тусгай хувцсаар чимдэг. Гэвч эцсийн шийдвэрийг Анна Винтур гаргадаг бөгөөд олон алдартнууд түүний стандартад нийцээгүй шалтгаанаар татгалзсан тохиолдол олон бий.
Хандивын үр ашиг
Энэхүү арга хэмжээний тасалбар өндөр үнэтэй ч орлого нь буяны үйлсэд зориулагддаг. 2013 онд 9 сая, 2014 онд 12 сая, 2019 онд 15 сая доллар цуглуулжээ. Met Gala өнөөдөр Нью-Йоркийн хамгийн том хандивын үйл ажиллагааны нэг хэвээр байсаар бөгөөд нийтдээ 200 сая долларыг Хувцасны хүрээлэнгийн төлөө босгосон байна.
