Олон улсын алдартай франчайз болох Mission: Impossible-ийн наймдугаар анги болох “The Final Reckoning” киног шүүмжлэгчид аль хэдийн “зуны хамгийн сэтгэл гутраасан кино” хэмээн нэрлэж байна. Уг бүтээл нь Том Крузын Этан Хантын түүхэн замналд төгсгөл тавих гэж буй хэдий ч, франчайзын урьд өмнөх адал явдал, хөнгөн хошигнол, галзуу уралдаануудаас эрс өөр, бараан, гутранги өнгө аяс давамгайлж байгаа юм.
Бараг бүхэлдээ хонгил, агуй, далайн гүн дунд өрнөх үйл явдал нь киноны уур амьсгалыг улам бүр харанхуй, уйтгартай болгожээ. Одоогийн дэлхий дахинд өрнөж буй хямрал, зөрчилдөөнүүдийг уламжлалт голливүүдийн зугаатай кино биш, харин сүйрэл, цөмийн аюул заналхийлэл, иргэншлийн мөхлийн тухай бараан туурвил болгон үзүүлжээ.
Сюжет нь хиймэл оюун ухаан болох Entity интернетийг эзэлж, дэлхийн сүйрлийг авчрах тухай ба Этан Хант ердөө хоёр жижиг төхөөрөмж холбож уг аюулыг зогсооно гэх тун энгийн шийдлээр төгсдөг. Харамсалтай нь, уг “хорын капсул” буюу USB төхөөрөмж нь Хантын найз Лютерийн халаасанд хамгаалалтгүй орхигдсоноос муу талын дүрд хялбархан шилждэг.
Ийнхүү шүүмжлэгчид киноны үйл явдлын логик алдааг шүүмжилж, “Mission: Impossible” франчайзын нэрийн хуудас болсон адал явдал, хошин өнгө аяс ор тас алга болсныг онцолжээ.
Хэдийгээр Том Круз бие даан гүйцэтгэсэн агаарын акробатын үзүүлбэр нь киноны цор ганц сонирхол татах хэсэг болж чадсан ч, энэ нь өмнөх ангиудын ижил төрлийн үзүүлбэрийн хуулбар мэт санагдаж байна. Уламжлалт хеликоптер, ачааны онгоцны хойноос хөөцөлдөхөөс залхсан кино бүтээгчид энэ удаа хоёр далавчит хуучны онгоц сонгосон нь олон хүнд эргэлзээ төрүүлж байна.
Хэрэв франчайз үргэлжлэх юм бол дараагийн ангид Этан Хант пенни-фардинг унаж, гудамжаар зугаалах ч юм билүү. Тиймээс “The Final Reckoning”-ийг “Mission: Impossible” франчайзын сүүлчийн анги хэмээн зарласан нь магадгүй зөв шийдвэр байж болох юм.
Харамсалтай нь, ийм түүхэн төгсгөл иймэрхүү харанхуй, хэт сүржин өнгө аястай болсон нь олон үзэгчид, шүүмжлэгчдийн хувьд гүнзгий урам хугарал авчирч байна.
