Токиод 16,500 тасалбар бүрэн зарагдаж, үзэгчид сэтгэл хөдөлсөн сэтгэгдлээ хуваалцав
Япон Улсын нийслэл Токио хотод тоглож буй “Монгол хаан” жүжиг асар их амжилт олж, нийт 16,500 тасалбар бүрэн зарагджээ. Энэхүү бүтээл нь Монголын түүх, соёл, сүр хүчийг тайзнаа дахин амилуулж, япон үзэгчдийн анхаарлыг татаж байна.
Одоогоор жүжиг Токиод 11 дэх удаагаа тоглогдож байгаа бөгөөд тасалбарууд тоглолт эхэлсэн эхний гурав хоногт багтаан дууссан нь урьд өмнө байгаагүй амжилт юм.
Продюсерын сэтгэгдэл
Жүжгийн продюсер Грег Сузуки энтертайнментын салбарт 40 жил ажилласан туршлагатай бөгөөд тэрээр ийн хэлжээ:
“Би олон улсын маш олон жүжиг, тоглолт дээр ажиллаж байсан. Гэхдээ эхний гурав хоногийн дотор бүх тасалбар зарагдсан тохиолдлыг өмнө нь огт үзээгүй. Энэ бол үнэхээр онцгой амжилт.”
Үзэгчдийн сэтгэгдэл
Японы үзэгчид “Монгол хаан”-ыг үзсэний дараа дараах сэтгэгдлээ хуваалцсан байна:
- “Жаргаж үзлээ, сэтгэл хөдлөм байлаа.”
- “Сэтгэл маш их хөдөлж, одоо ч тайвширч чадахгүй байна.”
- “Монгол хэл мэдэхгүй ч жүжгийн бүх агуулга ойлгомжтой байлаа.”
- “Тулааны хэсэг, тайзны үзүүлбэрүүд үнэхээр гайхалтай байсан.”
- “Сүрдмээр, огшмоор жүжиг байна.”
Эдгээр сэтгэгдэл нь Монгол соёл, уран бүтээлийн олон улсын чансаа өсөж байгааг илтгэнэ.
Дараагийн тоглолтууд
“Монгол хаан” жүжиг 2025 оны аравдугаар сарын 20-ныг хүртэл Токио хотноо өдөр бүр тоглогдох бөгөөд үүний дараа аравдугаар сарын 24-26-нд Нагоя хотод үргэлжлэхээр төлөвлөгджээ.
Монголын уран бүтээлчдийн энэхүү бүтээл нь зөвхөн түүхэн сэдвийг төдийгүй үндэсний бахархлыг дэлхийд хүргэж байгаа нэгэн соёлын гүүр болж байна.
