Монголын кино урлагийн нэрт найруулагч Ж.Сэнгэдоржийн хамгийн сүүлийн уран бүтээл болох “The Muralist” буюу “Ханын зураач” уран сайхны кино олон улсын Таллины “Хар шөнө” (Tallinn Black Nights Film Festival) кино наадмын үндсэн уралдаант хэсэгт шалгарчээ. Ийнхүү тус бүтээл ирэх арваннэгдүгээр сарын 19-нд дэлхийн нээлтээ хийхээр болсон байна.
“Сэтгэлийн зураас”-аас дэлгэцийн бүтээл хүртэл
Найруулагч Ж.Сэнгэдоржийн хэлснээр, тус кино нь зохиолч Б.Хишигжаргалын “Сэтгэлийн зураас” хэмээх туужаас сэдэвлэсэн бөгөөд зураачийн дотоод ертөнц, уран бүтээлийн үнэ цэнийг өгүүлдэг аж. Зохиолч Б.Хишигжаргал нь уг киноны продюсераар ажиллажээ.
Киноны зураг авалт 2024 онд эхэлж, 45 хоногийн турш Улаанбаатар хот болон орон нутагт хийгдсэн байна.
Уран бүтээлчдийн баг
- Гол дүрд: Өвөр Монголын жүжигчин, найруулагч Б.Баян-Ерөөлт
- Ерөнхий оператор: Э.Нэргүй
- Ерөнхий зураач: Б.Тэгшсүрэн
- Продакшн: “Логик фильм” студи
Ж.Сэнгэдорж “Ханын зураач” киног “уран бүтээлчийн сэтгэл, зураачийн дотоод ертөнцийн тухай гүн ухааны илэрхийлэл” гэж тодорхойлсон юм.
Монгол кино дэлхийд
Түүнчлэн найруулагч Ж.Сэнгэдоржийн өөр нэг бүтээл болох “Чимээгүй хотын жолооч” уран сайхны кино нь 98 дахь удаагийн “Оскар”-ын шагнал гардуулах ёслолын урьдчилсан шалгаруулалтад Монгол Улсаа төлөөлөн оролцохоор болсон билээ.
Монголын кино урлагийн бүтээлүүд сүүлийн жилүүдэд олон улсын наадмуудад амжилттай оролцож, дэлхийд Монголын нэрийг түгээж буйг салбарынхан онцолж байна.
